Wir Hainrich von Gotes genaden chunig ze Behaim und ze Polan, herzog ze Charnden und grave ze Tyrol
und ze Gorcz, vogt der gotzhäwser ze Aglay, ze Triende und ze Prixen, verjehen an disem priev, daz für
uns chom der ebt apt Hainrich von sand Pauls in dem Lavantal und liez uns sehen und horen die hantvest,
die er und sein gotzhaws und seins gotzhaws samnunge hat von pabsten, von chaysern und von andern
herzogen ze Charnden, und pat uns mit ganczem ernst und fleiz, daz wir im und seinen nachchomen und seinem
gotzhaws und der samnunge da selben die selben hantvest stete behielten ewichleich. Nu haben wir des vorge
nanten apt Hainriches gesleiches pet an geschen und durch gotes liebe und unser und unser vordern sel hails
willen loben wir im, seinen nachchomen und der samnunge des obgenanten gotzhaws von sand Pauls alle die
hantvest, die si von allen pabsten, chaysern und herzogen von Charnden habent, stete und unzerbrochen
zebehalten ewichleich in aller der weis, als die hantvest sprechent, die si von in inne habent. Des
sint gezeuge unser liebe ohaim Mainhart, Albreht und Mainhart, die edlen graven ze Ortenburch, und unser
getrew Chunrat von Aufenstain, marschalch und hawptman ze Charnden, Hainrich der Grifner, Ulreich und
Peter von Liebenberch, Wernher der Schench von Osterwicz, Otte von Himelberch, Cholo, Volher und Mathai
von Planchspach und ander erber lewt genuch. Und daz dem vorgenanten apt und seinen nachchomen und dem
gotzhaws und der samnunge daz stete und unzerbrochen beleibe, gebn wir in disen priev versigelten mit
unserm hangendem insigel. Der ist geben ze Inspruk, do man zalt von Christes gepurt tawsent drew hundrt
jar und dreizzig jar, des suntiges vor sand Michels tag.