Ich Chadolt von Haslaw vergihe vnd tůn chvnt allen di nv sint vnd her nach chvnftich werdent di
disen prief horent od(er) sehent lesen. Daz mich der erber herr Apt heínrích von dem Chotweíg an sprách
vmb ainen zehent auf mínen hof ze Eísenbach. daz er ze reht solt an gehoren di samnvng des Gotz
havs ze Chotweíg. wan ich mich mít rehter gewíssen des hon erchant daz der selb zehent ze reht
an gehort daz Gotzhavs ze chotweíg. do gab ich dem selben herren Apt heínrích auf den selben zehent
ledichleich in seín hant auf seín gnad. Do be gnadet er mich ze stant her wíd(er) von sín(er) beschaídenhaít
vnd von sínen trewen. vnd hat mír lazzen den selben zehent nvtz an mínes líbes end. vnd swenn der
tot míh gepruet. so gehet der vogenant zehent hín wíd(er) reht vnd ledichleich an daz selb Gotz
havs ze Chotweíg an allen chriech vnd an alle wíd(er) red. mín(er) chind(er). mín(er) erben. vnd aller míner vrevnt.
Daz disev red stet beleíb an allen chriech. hon ich ge geben disen prief ze aínem vesten vrchvnde be
sígelt mít mínem ínsígel vnd mít mínes brvder ínsígel hern Otten. Dís(er) sach sint zevg. der vlrich
von greífenstaín. vnd sín svn d(er) vlrich. d(er) gvnther hevseler von wíldenstaín. d(er) wernh(er) hevseler. d(er)
Ott von waldach. d(er) níchlavs pfantschíppant von Jvckelz. d(er) Ott von weínzvrch. der eberhart
von Haslaw. d(er) Echart von Nvmbvrch. chv́nrat stv́mpech. perhtolt von sant petrelln. vnd
and(er) frvm levt. Daz ist geschehen ze wíenn daz den manen zalt do von chrístes gepvrt
waren Tausent íar. drev hvndert íar in dem ersten íar. an des haíligen chrevtzes tag an dem herbste.