Ich Alber von Ehenring vergihe vnd tůn chvnt Allen den di disen prief horent oder sehent lesen daz
mein vater her Leutold von Ehenring mit vrowen Agnes sein hausfrowen vnd aller seiner erben gvtli
chem willen hat mir vnd meinen erben auf geben di vogtei die her von dem erbarn Gotzhaus ze
Chotweig auf dem gůt ze Ehenndorf vnd ze Grendorf vnd sol ich auf dem selben gůt de
hein stewer haben noch rihtesolt noch herstewr denn daz man mir all Iar do von dient an sand
michels tag in minen chasten ze Gevels drei mut habern niht Gevelser mazz. vnd stirb ich on
erben so erbt dise vogtei hin wider an meinen vatern hern Leutolden vnd sein erben mit allem
dem reht als ich sei gehabt han on all wider red. Daz dise sache stetleich on alln chriech beleib
do gib ich vber ze ewigen vesten vrchund dem erbern Gotzhaus ze Chotweig disen prief besigelt
mit mines vater hern Leutolds insigel vnd mit minem insigel. Diser sach sind zeug. d(er) Ott zeltin
ger von Gevels. d(er) Ott vnd d(er) Ludweich sein vetern. d(er) Ott von wildenstein d(er) Garchart sein
průd(er). Ditreich d(er) hewfler. wernhart vnd wolfing sein průd(er). d(er) Ott von Ebergartin. d(er) heinrich
von Gwelhspach. Ditreich von dem graben. fridel hewsel. chůnrat stůmpach. vnd ander piderb
levt den daz chvnt ist vnd gewizzen. Diser prief ist geben ze Gevels do von christes gepurt
waren dreutzehn hundert iar in dem sehsten iar an sand Iorgen tag