Ich chvnrat von flerde. vnd ich Aentel hern Otten tochter von celking. des vorgenanten hern chvnrats havsfrowe. wir vergehen allen
den di disen prief lesent oder horent lesen. die nv lebent vnd hernach chvnftig sint. Daz wir vns verricht haben mit meinem vater hern Otten
von celking. vnd mit meiner mvter vrowen Elsbeten seiner havsfrowen. vmb allen den erbteil der mich Aenteln iet von in paiden an ge
vallen daz ich mich des verzigen han. ez sei an hvsern. oder Leut vnd gwt. vnd wie daz genant ist. vnd dar vmb hat mir mein vater her Ott(en)
von celking vnd mein mvter vrowe Elsbet gegeben vier hvndert phvnt wienner phenning. vnd pin der recht vnd redleich gewert. wand(er)
di selben vier hvndert phvnt sint geleit an daz havs ze flerdenperge. daz mir mein vater hat gechauft. vnd zwen mayr hof. di da ligent vnder
dem selben havs. vnd swaz do zv gehoret. von vrowen Margreten hern Hadmares tochter von flerde. vnd daz dise red stet vnd vngeprochen beleib so
gib ich vorgenante Aentel disen p(ri)ef ze ainem offen gezevg. vnd zv ainem waren vrchvnde. vnd zv ainer ewigen wistnvng diser sache. versigelten
mit meins wirtes Insigel hern chvnrats von flerde. wand(er) ich selb nicht Insigels han. vnd avch mit der erbern herren Insigeln di hernach an
disem prief geschriben stent. hern stephans von Meissaw. hern chvnrats von potendorf. hern Dietriche von pilichdorf. der ze den ziten
hof marschalich was. hern vlrichs von pergaw. hern stephans von havnvelde. hern seifrides von chranichperch. di alle diser sache gezevg
sint mit ir Insigeln. vnd ander frvme Leut genveg den dise sache wol chvnt ist. Diser prif ist geben ze wienn(e) do von christes gebvrt
waren ergangen drevzehen hvndert jar. indem Nevnten jar ze phingsten -