Ich Weichart von Arnstein mein hausfrow vro Agnes vnd all vnser erbn veriehn offenlich vnd tůn
chunt allen den di nu sint vnd hernach chvnftich werdn di disn prief horn od(er) sehnt lesn daz wir
vns verdachtem mvt vnd mit zeitigem rat aller vnser vrevnt gvtlichem willen habn verchaufet reht
vnd redleich ze der zeit da wir daz wol mohtn getůn dem erbern herrn Apt p(er)tein vnd sinem Gotz
haus ze chotweig ewichleich daz P(er)chrecht ze chirchling mit samt dem Geriht vnd allez daz
daz wir da habn versvht oder vnversvht vmb ahtz vn(d) sehtzch pfvnt pfenning wienner mvntz
des vber svlln ich vnd mein hausfrow vro Agnes vnd vnser erbn des vorgnanten Apt p(er)tein vnd
sines Gotzhaus ze chotweig reht gwer vnd scherm sein fv(e)r alle ansproch als gewonhait vnd
reht ist in dem land ze O(e)sterreich. Daz dise red fvrbaz ewichleich beleib an alln chrieg vnd stete
vnzerbrochn han ich dem vorgnantem Gotzhaus ze chotweig gegebn disn prief ze einem ewign
vrchvnd vnd ze ein(er) stetn sicherhait Besigelt mit minem insigel vnd mit der erbn herrn insigel
h(er)n Ottn des zelking(er) von Schala. hern weicharts von Tegel. hern heinrichs des p(r)ibets von
wald. vnd des Otten von wezznberch. diser sach sint tzeng der Alber von chotming. der Jans
von chotming. der Dietreich von Gesersdorf. der chvnrat von Arnstein. der greyshan von Rohn
berch. der hauch v(on) Arnstein. ditrich von Tzvch. vnd vnsers Gotzhaus levt. Jacob der schreiber
wisint hvfmeist(er). Ott sein brvder. chvnrat der schafer. Albreht der rihter. Peter. zevwein d(er)
chemmer. Engltschalech. chvnrat d(er) hermpach. vnd ander erber levt den daz chvnd ist vnd genvg
zen. diser prief ist gebn ze chotweig. do von christes gebvrt warn ergangn drevtzehn hvndert
iar in dem drevtzehntn iar an sand Ge(o)rgn tag