Ich Haug von Wartenstain ich Diemut sein Housvrowe ich Eralig ir tocht(er) ich Haug und Stephan ir Sune ich
Hans von Possendorf ir Aydem und alle unser erben veriehen und tuen chunt allen den die disen prief lesent od(er) hozent
sehen die nu lebent und her nach chunftich werdent daz wir nach rat unserz vreunt und mit gunst aller unser erben
mit gesament hant ze den zeiten do wir iz wol getuen mochten chouft haben unsern drey lehen und ein hofstat ze
Prunne mit alle dev und daz zu gehoert ze wld und ze dorf gesuht und ungesuht vstuecht und unvstuecht als wir sev
in nutz und in gewer auf disen heutgen tag her pracht haben umb zwai und sechtzik phunt phenning wiener munizz
der wir recht und redlich gewert sein dem ob(er)n h(er)rn Apt Wernharten unser frowen Gotshaus ze Goetweig fuer
baz allen seinen und seines Gotshaus frumen mit dem vor genanten Guet ze schaffen v(er)setzen und chouffen als iz im un(d)
seinem Gotshaus aller pest fueg an allen ietzsal von uns und unsern erben und durch merer sicherhait setz wir uns unser
schadenleich mit alle dev und wir haben in dem land ze Ostrich ze schirm dem ob(er)n h(er)rn Apt Wernharten und seinem
Gotshaus ze Goetweig uber daz e genant guet fuer alle ansprach von uns und unsern erben als schirms recht ist in dem
land ze Ostrich Daz dise red also stet unzebrochn beleib gib ich Haug von Wartenstain und ich Hans von Possendorf
sein Aydem dem ob(er)n h(er)rn Apt Wernharten und seinem Gotshaus ze Goetweig disen prief versigelt mit unsern insi
geln want Awich Haug und ich Stephan des Wartenstain sune nicht aigen insigel haben geben wir dem oft genanten
h(er)rn und seinem Gotshaus ze Goetweig disen prief sigelt mit h(er)rn Haugen insigel des probstes von sand Andre
und h(er)rn Chunrates von Tiernstain h(er)rn Otten von Winzenberch h(er)rn Bernhartes von Ruzdorf insigel zu einer steten sich(er)
hait und zu einem waerenge zeug diser sache want sev den chouf gewandelt habent des sint gezeug her Wernh(er)
von Walch her Chunrat des luhartes sun von Ruzdorf Peter d(er) Wartenstainer Otte von Purnpach Stephan von
Otte die Hawnwalder Emler von Chuefarn und and(er) piderb leut genueg den dise sache wol chunt ist Ditz
ist geschehn und ist d(er) prief geben ze Goetweig do von Christes gepurt waren ergangen Dreuzehen
hundert jar dar nach in dem drey und zwaintzigsten jar des nesten tags nach sand Mathies tag