Ich Andres h(er)n mathias svn von vnter dem tor genant vnd elliv meinv geswistereyt wir
sprechen an disem prief vnd tvn chvnt allen den die in sehent oder horent lesen daz wir recht
vnd redlichen ze chaufen haben geben vnsem stiefvater h(er)n alber dem schenchen vnser
wisen pei talarn die lehen ist von dem pfarher von polarn vmb aht phvnt wienn(er) phenning
vnd vmb ein stotross daz er vns gar vnd gantzlichen gewert hat vnd haben auch im
die selben wisen geben ledichlichen vnd vninchvmbert daz er seinen frvm da mit schol schaffen
mit chsetzen oder mit chaufen vnd geben swen er wil an allen chrieg vnd an aller irrgal
vnd dar vber gib ich vorgenant(er) Andres disen prief besigelt mit meinem Ingsigel ze
einem warn gezevg diser sach. Der prief ist geben do von christes gepvrt warn drevtzehen
hvnd(er)t Iar in dem siben vnd zwaintzigistem Iar an sand scolasticen tag - -