Ich Vlrich von Toppel vergich offenbaer an disem Brief vnd tůn chvnt allen den di in sehent oder horent
lesent daz ein chrieg gewesen ist zwischen den erbern geistleichen herren Apt Otten vnd seiner samnvng
vnser frawen Gothavs ze Chotwig vnd mir vnd meinen prvdærn vmb drev hvndert phvnt phenneng di
ich in Innehabt het diselbe anspravch vnd aller der chrieg der zwischen vns vntz her gewesen ist ist mit
vnserm gvtleichem willen frevntleich beriht Also daz Ich vnd mein prveder di ege(nan)nten herren Apt Otten
vnd alle di samnvng ze Chotwig der vorgen(an)nten anspravch ledich lazzen haben vnd sev nihtes zeihen denn
aller trewen vnd alles gvtes vnd dar vber ze einem waren vrchvnd diser sache gib Ich in disen offen prief
versigelten mit meim Insigel vnd mit meins pruder hern Weicharts Insigel vnd ist der gegeben datz
Chotwig do man zalt von Christes gepvrt drevzchen hvndert Iar dar nach In dem Aht vnd zwa
enzchistem Iar an sand Ceclien tag