Wir Ot von Gots gnaden Abt vnser Vrowen gotzhauß ze Chotweig Veriehen offenlich an disem brief
daz wir mit vor dahtem mu(e)t vnd mit gunst vnser samnung vnserm schreiber hern Perchtolden
di genad getan haben daz wir im den weingarten der gelegen ist zwuschen paumgarten vnd furt
vnder vnserm perge vnd der emalen gewesen ist maister Oton vnsers schreiber dem got genad im
geantwurt vnd auf gegeben haben mit des herren hant ledichlaich ze seinen aigen also daz er in pauen
sol nach seinen triwen vnd auch nuczen mit allem nutze swi der genant ist di weil er lebt an allen
irresal vnd swenn er nimer ist swie danne der vorgenant weingart stat in pawe oder zewelicher
leut aht daz ist also sol er ledichlaich hin wider gevallen auf vnser abtai ze Chotweig herren vnd
vrowen an allen chrieg vnd dar vmb daz im daz stat behalten werd von vns vnd von vnsern nach
chomen geb wir im disen offen brief versigelt mit vnserm hangunden Insigel vnd mit der erbern
Gaistlichen vrowen Jnsigel der abtessin von Erla di des selben weingarten perchvrowe ist vnd mit
des erbern h(er)rn hern Jansen Jnsigel von Chunring ze einem offen vrchund diser sach Der brief
ist gaben ze Chotweig do man zalt von christes geburd dreuczehenhundert Jatr in dem zwai vnd
dreizzigistem Jar an dem suntag ze mitter vasten.