Ich Weichart der Bittenpech Vergich an disem Prief und tůn chunt allen den di in sehent oder hornt lesen
di nu sind oder hernach chumftich werdent Daz ich mit wol bedachtem mvt und mit meiner hausvrawen
vrawen Elspten und aller unser Erben gvtleichem willen und auch sonderleich mit meins pruder Hain
reichs und seiner hausvrawen vrawen Gerdruten und auch aller irer erben gunst und gutleichen willen
und auch nach rat unser nachsten und unser pesten vrevnt und auch zu der zeit do ich ez wol getven
mocht allez daz Erbe daz wir gehabt haben umbe den Chotwig und daz von dem gotshaus ze chotweig
ist ez sei pvrchrecht oder lehenrecht als ez uns von unsim vater und von unser mvter seligen an ge
vallen ist ze veld und ze dorf vesucht und unvsucht gestift und ungestift swi daz genant ist oder swo
daz gelegen ist als wir ez in nutz und in gewer her pracht haben Daz han ich vorgenanter weichart mit
der gunst und vorgeschriben stet allez sampt halbes ledichleichen als meinen unversprachen Erbetail
Verchaufet recht und redleich meinem genedigem herren abpt wulfingen von dem Chotwig und seiner
samnung umbe sechtzich pfunt gemaener wiener pfenning der ich schon und erloch gewert pin
und setze auch mich und meinen vorgenanten pruder desselben gvtes als vorgeschriben stet schirm
und gewern mit sampt unsern erben fvr alle anspruch als landes recht ist ze Osterreich Ez schol auch
mein herr von chotwig und sein samnung mit dem ofutgenanten gvt allen iren frumen schaffen als in
und auch dem gotshaus aller pest fvgt Und daz di wandelung und auch der chauf stet und unzeprochen
beleib von uns und von allen unsern erben gib ich oft genanter Weichart und ich Haenrich sein prud(er)
zu einer Bestetigung disen ofen prief versigelten mit unsern hangunden Insigeln Darzv sind auch der
sache gezeug unser genediger herre her chadolt von der Altenburch her Jans der Gutpech her peter
von palt her chvnrat von pirbaum mit iren hangunden Insigeln wand si der wandelung und auch
des chaufes sind paedenthalben unser scheidleut gewesen der prief ist auch gegeben und ist di wandel
lung geschehen do man zalt von christ gepvrt dreutzehen hundert Jar in dem siben und dreizzigstem
Jar dar nach an sand agnesen tag ze chotwig auf dem perge