Ich Ott von Wals vergich offenleich an disem prief vnd tuen chunt allen den die in lesent oder
lesen horent Daz der Erber herre mein lieber Oheim Abpt Wulfinch von dem Chotweich mir en
pholhen hat die Vogtey datz Pirichach leut vnd gut auf der hirden vnd auf allem dem gut daz
daz Gotshaws do hat uersuecht vnd vnuersuecht swie daz genant ist Vnd han ich im vnd seinem
Gotshaws mit meinen trewen gelubt dor an tze dienen Ich gich auch chains Rechten nicht ze haben an
der selben Vogtey noch chainer meiner eriben Nuer di weil vnd ich dem vorgenanten herren vnd dem
Gotshaws dor an gedienen vnd geuallen magch Ez hat auch der egenant herr oder wer Abpt datz
dem chotweich ist des recht vnd gwalt ob ich im nicht fueg vnd geuall mich vercheren an der
Vogtey vnd enphelhen wem er wil Vnd tzu einem vrchund diser sache gib ich dem vorgenanten
herren Abpt Wulfingen vnd seinem Gotshaws ze Chotweich disen prief uersigelten mit meinem
anhangunden Insigel Der prief ist gegeben do man tzalt von Christu gepuerd dreutzehen
hundert Jar dor nach in dem funf vnd viertzigisten iar an Sand Gorgen tag