Ich Chuonrat der Pchenrävter und mein hausvrowe vrow Sophey und Alle unser erben veriehen und tuen chunt Alle den di disen prief lesent oder hoerent lesen di nu lebent
und her nach chünftich sind daz wier mit verdachtem muet und mit guetleichem willen Aller unser vreunt zechauffen haben gegeben Herworten dem Schenenaer von Aulbach und
Ruegern dem Strohechlein von Veltz und All ier paider erben unsers rechten Aygens ein lehen ze Veltz daz vor gewesen ist Nyclas des Wallseer un(d) Chuonratz des Weizzen und
Chuonratz des Aytlman und der recht wier Auch gäntz und gar gechauft haben daz vorgenant lehen mit All und tot zue gehoert zeweld und zedorf swie daz genant ist mit
Aygenschaft und mit Alle dem rechten Als wier iz von Alter her gehabt haben und Auch nu von den lAvten Ab gechauft haben Also hab wier iz den vorgen(an)ten Herworten und Ruegern
und Alle iern erben vreyleichen und ledichleichen zechauffen geben umb sechczig pffunt und vierdhalb pffunt phenning der wier gerechten taegen gewert sein und daz vorgenant
lehen hat der vorgenant Herwort und Rueger mit der Aygenschaft durch ier paider sel willen gegeben unser vrawen gots haus ze Chotweig Also mit beschaidner red daz se
und ier erben ze einem gestift Alle iar wellent und schulln dem vorgenanten gots haus ze Chotweig taihen viertzig pfenning Wienner münizz Auf sand Goergen tag und nicht
mer man schol Auch daz vorgenant purchrecht taihen dem Ammann des gotshaus ze Chotweig hintz dem dorflein und nicht Anderstwo Wier schullen Auch des vorgenanten lehens
und der Aygenschaft des vorgenanten gots haus ze Chotweig und des vorgenanten Herwortes und Ruegers und Aller iar erben schirm und gewer sein fuer Alle Ansproch
Als Aygent recht und gewonhait ist in dem land ze Oesterreich Wär Auch daz se dhain chrieg mit dem rechten An gieng iz wär umb di Aygenschaft oder umb daz lehen daz
schull wier in Alles Auz richten An All iern schädn tæt wier des nicht swelhen schädn se des naemen iz wær mit nach raisen oder mit chlag oder wie der schad genant sei den
ier Ainer oder ier erben pei iern trewn ungesworn gesagen mügen den schull wier in wider chern und Ablegen An Alle wider red und Allen chrieg daz schullen se haben
Auf unsern trewn und Alle unserm guet daz wier haben und Auf Alle dem guet daz wier noch gewinnen in dem land ze Oesterreich daz di red stæt und unzeprochen beleib geb
wier in dar über disen Prief versigelt mit mein vorgenantes Chuonrates des Pchenrävter Anhangundem Insigel und mit meines prueder Jansen des Pchenrävter Insigel und
mit meines swäger Otten des Jungenhofrichter von Neidclik Insigel Der prief ist gegeben dAtz Veltz do von Christes gepuerd sind gewesen dreutzehen hundert iar dar
nach in dem fümf und viertzigistem iar des suntags nach dem Ewenweich tag