Wir Johans und Pawlt von Chunring obriste Schenken in osterrich tun offen an disem
brief allen leuten daz unser purger Chunrat der Musat von Swinwrt fur uns chomen
ist und des an unsern triwen hat und wir erben lazen daz er und alle sinen chind und
auch sein bruder Thomas Niclas Ulreich und Cuncz ir swester und alle yrew chinde
die die vorgenanten geswistreit habent und auch gewinnent und dar zu ir stiefmuter
Chunigunt und alle yrew chinde gemainchleich verzeihen habent daz siw allew chlain
Recht nach irrem widerige sinz der hofstat daz Flemporf und waz dar zu gehoret
ze velde und ze dorf als ez ir vater gehabet hat nimmer gehaben sullen nach gewinnez
wan daz die vorgenanten hofstat und waz dar zu gehoret Hainrich der choller und
sein hausfrowe Elspet ledichleich an alle anspach haben und niezen sullen verchawffen
versaczen und versezen geben swem siw wellent mit ir aller guetlichen willen wand siw
ez von in redelich und vaht gechauft und gelost habent um ir aigenhaft gut daz
siw in dar umb gegeben habent dreizzich phunt wienner phenning und der uber
zu ain urchunde und gezeuge geben wir in disen brief versigelt mit unsern in
sigeln nach christes geburde dreutzehen hundet iar in dem funf und virczigistem
iar an sand Thomas tag