Ich Leb von Eytzendorf und ich Aecht sein Hausvrow Verjehen mit disem Brief
und tun chunt allen den die in sehent lesent oder horent lesen Daz wir mit gesamt
hant mit gunst und willen alles unser Erben zu der tzeit do wir y huet gewin mochten
Hansen unsern Sun und au(ch) Laurenz seiner Hausvrowen und iren Erben rehte un(d) redlich
verchauft und gegeben haben unsern Hof ze Eytzendorf mit allen den nuczen und rehten
als wir den selb ze wald und ze Veld vischaetze und vaeschaetze in reht(er) Eygenschaeft yemer
her genuczt und ledichleich gehabt haben umb Newn und dreizzigk Pfund wien(er) phen(ning)
der uns gar und gaentzleich gewert sein Und haben auch in da laedichleich auf gegeben
mit unsers rehten Lehen Herren hant Daz ob(er)n und des wirdigen Herren Abbt Wul=
finges ch(l)oster ze Goetweich dem wir da von dient aht Pfund phen(ning) da ist alle Jar
ein Pfund abgetzelt in ein Pfund phen(ning) ze chaufreht Wer sein auch daz selb Hofs
in reht(er) Eygenschaeft und waz zeu(n)sigen ze verchaufen ze haben ze gebn wem si wellen fur alle
ansprach als Eygenschaeft reht ist und gewonhait des landes in osterreich An welchen
schaden si daz setz(en) mit der oder naemen den haben wir in an alle guete gar und gaentzlich
ab ze legen wie unser trewen weil gesellen si den schad(en) haben auf uns und auf alle den
und wir haben Und daz in di red also staet(e) bleib und unzepruchen beleib daz geben
wir in zu einem urchund der sache alle disen gegenwurtigen brief insigelen mit unsers
vor genant(en) gnaediges Herren Insigel Abbt Wulfinges un(d) mit dez ob(er)n mannes Insigel
her(r)n Albrehts von Walse zu der tzeit Purkg(raf) ze Steyr di wir dar umb fleizzichleich
gepeten habn daz si zu einem zeug in an alle schaden an den Brief gehangt haben wand
wir und unser Erben niht Aygens Insigels haben Der Brief ist gegebn und di sache geschehen An
sand Marten tag do man von christi gepurd zalt dreutzehen Hundert Jar dar nach in
dem funf und Vierzichstem Jar