In nomine domini amen anno Nativitatis eiusdem millesimo quadringentesimo quartodecimo indicione septima die undecima mensis may hora completorii vel quasi in civitate
pragensi in domo presbiteri et discreti viri Hermanni clerici morav(iensis) civitatis pragen(sis) ad hoc specialiter conducti in mei notarii publici et testium subscriptorum ad hoc specialiter vocatorum et rogatorum presencia
personaliter constitutus honorabilis vir dominus Johannes dictus mroczko de brod canonicus ecclesie sancti Egidii pragen(sis) procurator et procuratorio nomine honorabilis viri domini Nicolai de pruschellitz
plebani in baurzicz ad hoc specialiter constitutus prout de sue procuracionis mandato per quoddam publicum instrumentum manu discreti viri domini Johannis clerici pragen(sis) diocesis publici imperiali
auctoritate notarii scriptum et signatum ac sigillo venerabilis viri domini Nicolai decani ecclesie sancte Marie in castro pragen(sis) in cera rubea in quadam capsula lignea
filo serico rubeo et viridi dependente sigillatum quod quidem instrumentum sanum et integrum non viciatum non cancellatum nec in aliqua sui parte suspectum
coram me notario publico et testibus infrascriptis produxit et ostendit cuius quidem instrumenti tenor de verbo ad verbum sequitur et est talis In nomine domini amen
anno a nativitate eiusdem millesimo quadringentesimo quartodecimo indicione septima die vero decima mensis may hora vesperorum vel quasi pontificatus sanctissimi in christo patris
et domini nostri domini Johannis divina providencia pape vicesimitertii anno quarto in mei notarii publici et testium infrascriptorum ad hoc specialiter vocatorum et rogatorum presencia
personaliter constitutus honorabilis vir dominus Nicolaus de pruschellitz plebanus in baurzicz pragen(sis) diocesis volens et affectans ut asseruit de iure suo
quod habet in dicta ecclesia in baurzicz et ad eam providere et eam in manibus reverendissimi in christo patris et domini domini Conradi dei gracia archiepiscopi pragen(sis)
vel eius vicarii in spiritualibus generalis ex causa permutacionis fiende cum honorabili viro domino Johanne dicto mroczko de brod canonico ecclesie sancti Egidii
pragen(sis) pro sua prebenda quam habet in dicta ecclesia sancti Egidii pragen(sis) libere et sponte resignare et dimittere fecit constituit et ordinavit
suos veros et legitimos procuratores actores factores et negociorum suorum gestores et nuncios speciales ita tamen quod generalitas specialitati non deroget
nec econtra videlicet honorabiles viros dominos Johannem dictum mroczko de brod canonicum ecclesie sancti Egidii pragen(sis) et Nicolaum de pruschellitz
plebanum in baurzicz pragen(sis) diocesis absentes tanquam presentes dantes et concedentes eisdem et eorum cuilibet in solidum ita quod non sit melior
condicio occupantis sed quod unus eorum inceperit alter eorum prosequi mediare valeat et finire plenam et liberam potestatem et mandatum speciale
pro se et nomine suo dictam ecclesiam in baurzicz cum omnibus iuribus et pertinenciis suis in manibus reverendissimi in christo patris et domini domini Conradi
archiepiscopi pragen(sis) vel eius vicarii in spiritualibus generalis ex causa permutacionis fiende cum dicto domino Johanne dicto mroczko de brod pro sua
prebenda quam habet in dicta ecclesia sancti Egidii pragen(sis) libere et sponte resignandi et dimittendi et in locum suum unum vel plures procuratorem
vel procuratores substituendi et eosdem revocandi tociens quociens sibi videbitur expedire et generaliter omnia et singula faciendi que in premissis
et circa ea necessaria fuerint seu quomodolibet oportuna eciam si mandatum exigant magis speciale promittens se ratum gratum et firmum
habiturum totum et quicquid per dictos suos procuratores vel eorum alterum aut substitutum vel substitutos ab eisdem vel eorum altero actum
factumve fuerit in premissis sub ypotheca et obligacione omnium bonorum suorum presencium et futurorum Acta sunt hec in civitate pragen(si) in domo
habitacionis mei notarii publici infrascripti sub anno indicione die mense hora et pontificatu quibus supra presentibus ibidem discretis viris
dominis Johanne de brod et Wenceslao de pruschellitz clericis pragen(sis) diocesis testibus ad premissa vocatis specialiter et rogatis Et ego
Johannes clericus pragen(sis) diocesis publicus imperiali auctoritate notarius quia premissis omnibus et singulis dum sic ut premittitur agerentur et fierent
una cum prenominatis testibus presens interfui eaque sic fieri vidi et audivi ideoque hoc presens publicum instrumentum manu mea propria scriptum
exinde confeci et in hanc publicam formam redegi signoque et nomine meis solitis et consuetis signavi rogatus et requisitus in fidem
et testimonium omnium et singulorum premissorum Et ego Nicolaus decanus ecclesie sancte Marie in castro pragen(si) ad instanciam et
peticionem dicti domini Nicolai de pruschellitz plebani in baurzicz sigillum meum presentibus in testimonium premissorum duxi apponendum
Post cuius quidem instrumenti produccionem et ostensionem prefatus dominus Johannes dictus mroczko de brod procurator et procuratorio nomine
quo supra dictam ecclesiam in baurzicz cum omnibus iuribus et pertinenciis suis in manibus reverendissimi in christo patris et domini domini Conradi
archiepiscopi pragen(sis) vel eius vicarii in spiritualibus generalis ex causa permutacionis fiende cum seipso domino Johanne dicto mroczko de brod
pro sua prebenda quam habet in dicta ecclesia sancti Egidii pragen(sis) libere et sponte resignavit et dimisit Acta sunt hec anno indicione
die mense hora pontificatu et loco quibus supra presentibus ibidem discretis viris dominis Johanne de brod et Wenceslao de pruschellitz
clericis pragen(sis) diocesis testibus ad premissa vocatis specialiter et rogatis
Et ego Wenceslaus filius quondam Clementis de brod clericus pragen(sis) diocesis publicus imperiali auctoritate notarius quia premissis
omnibus et singulis dum sic ut premittitur agerentur et fierent una cum prenominatis testibus presens interfui eaque sic fieri vidi et
audivi ideoque hoc presens publicum instrumentum manu mea propria scriptum exinde confeci et in hanc publicam formam redegi signoque
et nomine meis solitis et consuetis signavi rogatus et requisitus in fidem et testimonium omnium et singulorum premissorum