IN Namen des herren amen Kundt und offenbar sey allermennigclich durch diß gegenwirtig offen Instrument und urkhundt
das in dem Jar als man zalt Nach der gepurt Christi unsers lieben herren funfftzehenhundert und in dem funfftzigisten in der achten seiner
Zal zu latein Indictio genant Bey regierung des Allerdurchleuchtigisten Grosmechtigisten unuberwintlichen herren herren Caroli des funfften Ro
mischen kaysers zu allen zeiten merer des Reichs In Germanien Hispanien baider Sicilien Jherusalem künigs Ertzhertzogs zu Osterreich her
tzogs zu Burgundi zu Brabant zu habspurg flandern und zu Tirol unsers allergnedigisten herren Irer mayestat kayserthumbs im ain und
dreissigisten und der andern aller Im funff unnd dreissigisten Jaren Auff Afftermontag den funfftzehenden tag des monats Julij In der Ach
ten stundt zu mittag zeit In des hailigen Reichs stat Augspurg und daselbs in der edlen gestrengen herren hanns Jörigen und herren dauidten gebrüedern von
paumgarten herren zu hohenschiwangau erbach kiremberg und kintzhaim Römischer kayserlicher und küniglicher Mayestaten Räthen gewon
licher behausung bey sant Anna Closter gelegen In ainem hindern stüblin seind die edelgenanten herren hanns Jörig und dauidt gebrüeder vonn
paumgarten In mein offenbaren Notarien und der hieunden geschriben glaubwirdigen gezeugen Insonderhait hierzu erfordert unnd erpetten ge
genwirtigkhait persöenlicher sturen unnd haben alda ainen protestation zettl fürbracht Mit mundtlichem und clärlichem antzaigen des In
halt desselben zettels zu protestiern und zubezeugen protestierten und bezeugten auch also offenlich vor mir Notarien und gezeugen Zierlichisten und
besten form rechtens Wie das Ire herrlichaiten zuthun künden oder mochten Theten auch sunst daneben alles das Ie
nig was derselb protestation zettell ferner In sich helt Welchen Ire herrlichaiten mir Notarien behendiget haben und durch mich offenlich verlesen lassen
der von wort zu worten also lauttet Herr Notari Wiewol das Gotzhauß stambs Weilandt herren hannsen von paumgarten un
serm lieben herren vatter seligen neben und mit verkauffung der grossen und klainen zehenden zu kettershausen und babenhausen auch das Ius
patronatus den kirchen satz und was derselben und pfarrlichen gerechtigkait anhengig und zugehörig daselbs zu kettershausen durch rechtmessigen
bestendigen Tittell unnd glauben ubergeben und zustanden gestelt und dieselbigen pfarrlichen recht und gerechtigkaiten Ietzo als nach absterben ege
dachts unsers lieben herren vatter seligen erblichen auff uns komen Iedoch ungeacht dessen So understanden sich Wordian und Mathous die dritter
zu kempten uns an sollicher unser angefallnen und habenden kirchen gerechtigkait zu mehr dann aimal weg und sonderlich an besetzung und
entsetzung Meßner und schülmaister Ämpter auch der hailigen pfleghafft und anderer der kirchen verwaltung thätlichen weis In der unse
rechten und auß kainer aignen gerechtigkait eintrag zuthun und unsir dadurch mit der that ein kirchenvogtey zutzeyhen und anmassen Und
wiewol die gemelten dritter durch herren abbt des obberüerten gotzhauß stambs und uns selbs das sie sollichs Ires aigenfätlichs unbegrundts
furnemens gentzlichen absteen wölten mit guter anstrieckung unserer gerechtigkait ersucht und ermant seind So werden wir doch
gesettiget unnd hinfür des Orths ungeirret und sich weiters eingriffs enthalten haben So werden wir doch glaublichen bericht das uber das al
les sie seyt diser tagen als unser pfarrer zu kettershausen mit todt abgangen abermals die schlüssel zu der kirchen Sacristey und kirchen zier
zustanden genomen sich derselben verwaltung underzogen und also Ir angen gewaltig unbegrundt furnemen und eintragen fürzutrucken
understanden Wöllichs alles als zu verletzeller unserer Rechten und gerechtigkaiten scheinlichen abbruch nachtail und schaden geraicht uns zun
herrtzen beschwerlich unnd der gestalt fürgän zulassen kains wegs leidenlich sein will Unnd damit wir durch stillschweigen und zusehen den
gemelten drittern sollichen Iren unmesslichen eingriff zubesahen und darauß ainigen fußstapff und behelff darzu einzuräumen nit ursach
geben So protestiern und bezeugen wir uns hiemit offenlich vor euch Notarien und gezeugen das wir den gedachten drittern ainiger gerechtig
kait zu der pfarz kettershausen und allen derselben zugehörungen es sey Meßnerey schülmaisterey hailigen pfleghafft und was der ge
leichen verwaltung Iren anhengig ist kains wegs gestanden auch nit gestanden Wie sy unns auch deshalben ainigen schein noch grundt
uber das wirs an sy erfordert nit fürgepracht oder darthun haben auch nit thun oder darpringen werden künden unnd derhalben wir uns solches der
dritter aigenfätlichen gewaltigen eingriffs zuthun beschwärdt haben und beschweren auch in solliche Ir ungebürliche unrechtmessige aigenfätliche
handlungen nit allain mit nichten gehellen bewilligt geduldt noch gestattet sonder wöllen wir auch nit allain uns sonder auch obgemelten herren
abbte und Gotzhauß zu stambs als denen so uns zu gewerschafft verbunden all und Ied unser recht gerechtigkait auch spruch unnd forderung wie
wir solliche in allweg haben und gewinnen mügen gegen obberüerten drittern hiemit außtruckhenlich unnd unverletzlich durch alle gepürliche weg
seiner zeit zuhandlen und zuerhalten fürgesetzt und vorbehalten haben Und bitten hierüber euch herren Notarien zum ersten andern und drittennmal
vleissig vleissiger unnd aller vleissigist dise unsere Ietzgethane protestation den obbenanten Wordian und Mathous drittern züsinuieren und zu
verkünden auch uns dyer unserer protestation und Insinuation ain oder mer offen Instrument und urkhundt wieuil wir deren nottürfftig auff
zurichten und mitzuthaillen durch derselben haben zugebrauchen Nach verlesung des Ietzgemelten protestation zettls thetten wolgemelte
herren hanns Jörig und dauidt gebrüeder von paumgarten ferner reden das Ietzt in dem verlesnen protestation zettl gehört were Also wolten sy sich
bester form Rechtens vor mir Notarien und gezeugen protestiert bezeugt und mich Notarien amptshalben ersucht haben Irer uber dise gethane protesta
tion nit allain glaubwirdig Instrument zumachen sonder auch dieselb protestation wie sich gepürt an gepürlichen orten züsinuieren und
zuverkünden Wölches ich mich amptshalben zuthun erpotten und daneben die nachbenanten gezeugen ernannt hab Solches alles mit sampt
mir Ingedenckh unnd zeugen zuthun des sy sich auch zuthun erpotten haben Beschehen seind dise ding Im und under der zal Christi Indiction kai
serlicher Regierung Monats Tag stundt und stat hievor geschriben in gegenwirtigkait der Erbern Bartholmeen Massers Tuchscherrers und simon
kayers lederers baider burger zu Augspurg als gezeugen Insonderhait darzu beriefft unnd erpetten
Und dieweil ich Jacob spindelmair burger zu Augspurg auß Römischer kayserlicher macht unnd gewaldt ain offner Notarius
der obvermelten erstattung fürpringen und verlesung des protestation zettels der gethanen protestation bezeugung und sunst
allen anndern obgeschriben sachen selbs persöenlich mit sampt den obgemelten gezeugen mit gewesen bin Solches alles also
geschehen unnd gehört derhalben so hab ich diß offen Instrument darüber gemacht mit meiner selbs handt geschriben
und underschriben auch mit meinem gewonlichen Notariat zaichen Tauff und zunamen gezaichnet und bezaichnet In glaub
unnd gezeugkhnus aller obgeschribnen sachen Amptshalben hierzu begeren erfordert unnd erpetten