Wir Johann Abbt vnser lieben frawen Gotshauß zu Hohenfuert, Joannes Steide der zeit Prior vnd ein gantz Eerwierdig
Conuent daselbsden, Bekhennen khundt vnnd Zuefelligkhlich mit disem offnen brieff: Das für vns khomen ist die Erbar Tugendthafft fraw, Catharina weilland des Er=
barn vnnd weisen Johannesen Wagners, vnsers vnderthen vnd Burgers allhie Nachgelassne Wittib, bracht vns für sich selbs vnd im Namen Jhrer Armen Waisen, in vnder=
thenigkhait für, Nach dem gedachter Jhr haußwiert seliger, in seinem leben, von vnsern vorfarn, verschrigner Zeit vnnd Jaren, dz Zway Reütter, das Praterholz so ligund
vnd Raint, mit dem ain vnd Obern ort, an der Khaltenprünner, vnd dan zu bayden seiten vnd Vnden, an der Lärnfurher gründ, Vnd dan die Tachen so naint, mit ainem
ort an des florian zu Zarteschlag, mit dem andern an des Casspar Webers zu Kysalt anstainn vnd Rainsalben daselbs, geündt vnündt, von Jhnen ordenlich erkaufft, vnd
gleichwoll nunmals Jhr vnd dem Gotshauß nach seinem abloiben dem Ordenlichen Landtsgebrauch dises Khünigreichs Behaimb haimbgefalln, Batte sy vns
aber hierauf demüetigkhlich, Jhr vnd Jhrer armen verlassnen Waisen, mit gnaden züerchaimen Vnd der sambt bemelten Waisen, gemeltes Reütter, auf sy alle vnd
Jhre Nachkhomen vnd Erben, aus gnaden zu bewilligen vnd züuerschreiben, Waily dan gedachter Johannes Wagner seliger, sich in zeit seines lebens, vill Jar gegen den
vorgemelten Prälaten vnd Gotshauß allhie, auch gegen vns, mit aller müglicher dienstbarkhait vnd wolmainung, wie ainem getrewen gehorsamen vnderthen gebürt
vnd wolanstet verhalten, Haben Wier Jhr vnd der armen Waisen vnderthenig bitt angesehen, vnd wöllen Jhr sambt den Waisen, waily sy vns vnserer anforde=
rung halben zu friden gestelt, sölche Reütter hiemit vergonnen vnd verleihen, Also vnd dergestalt, das sy vnd Jere khinder vnd khindtskhinder, mit sölchen Reüttern
thun vnd vmgeen handlen, es sey mit versetzen, vermachen, verschaffen, verkauffen vnd geben wem sie wöllen, Doch dz khain thail, sein gebüerenden thail, one vorwissen
vns oder vnserer Nachkhomen, mit dem wenigisten, sunderlich aus der herrschafft nicht verkhomern noch verkhauffen, Vnd da ainem sein thail fayl wierdet, sölle ers
das ander geschwistert, so allhie wohnet, am ersten anfailen, Vnd da sie des khauffs sich nit vergleichen khünnen, ainem andern doch in der herrschafft, Züuerkhauffen
fueg vnd macht haben, Es söll auch die obermelt Wittib, dz ain Reüt dz Praterholz genant, Jnzeit Jores lebens, vnd weil sy die Waisen bei der erhelt, vnd nit lang
Jmhaben nützen vnd niessen, dan nach Jhrem abgang sölle sölchs Reüt, auch auf Jere khinder vnd khindtskhinder, Zü gleichem thail fallen, Es sölle aber khain
thayl macht haben sein gebüerenden thail, mit diser bewilligten freyhait, sondern wie es sonsten mit dem Todtenfaal, in disem land breüchig, ausser der freünd=
schafft oder Erben züuerkhauffen, Die wier vns bei den khauffern, diser Reütter, Jn allweg, beüor genumben haben wöllen, Dauon aber söll sie, od(er)
wer sölcher reütter Jnhaber ist, von dem erstbemelten reüt, dz Praterholz genant, so in der grösse siben morgen inhalt, Vns vnd allen vnsern Nachkhomen, auf all
Sant Geörgen tag, siben groschen khlain (den groschen für siben behaimisch pfenning gerechnet) gleichfals in den S. Gallentag auch souil, Vnnd dan auch von dem
andern reüt die Tachen genant, so zehen morgen inhalt, Zehen der bemelten khlain groschen in den Sant Geörgen vnnd Gallentag, ewiges Zinses dauon zu raichen
pflichtig vnnd schuldig sein, Das alles ist vnser gueter will vnnd maynung, Zü Vrkünd wier Jhnen disen brief vnder vnseren vnd des Gotshauß allhie
angehangten aignen Jnsigillen verfertigt, Zügestelt haben, Geschehen am tage Mychaelis, Als man der mindern Zaal, nach Christi gebürdt Zall sibenzig vnd fünff
Jarn,