Anno d(omi)ni 1484 wir Johannes Geyer prior des Conuents von der
Gewicz Johannes prediger Nicolaus Sacristan thun kundt vnd
wissen allin vnd yczlingen die dissen Brieff sehen horen ader
lesenn das wir redlich vnnd rechtlich verkaufft haben vonn
guettem willen mit woll bedachtem mueth vnssern Hoff zw
pudikodorff thun art welcher Hoff genant ist Neukoms
Hoff dem ffurssichtigenn Steffan Bartoss nemlich vmb xxviij M(ar)k
zw legen alle Iar iij Mark vnd das geteilt ynn zway teyl zw
Sant Gorgen tag ij M(ar)k vnd zw Sant Michel auch ij Mark
also lang biss sich die abgemelte S(u)m(m) erffullit welcher Hoff gibt
alle Iar Recht Erb zinsse vj Scheffel korn vnd vj Scheffel habern
welcher Hoff etwo vberfiert vnnd Beschwert gewessen ist vnd nicht
verkauft mocht werdenn Von wegen des Schwerenn Czynss also
das er wust gelegin ist ein Etzlich Iar Warumb wir abgemelter
Johannes prior mit samer Bruderschafft haben Betracht die selbige
wustung vnd den schadenn des Conuents vnnd habenn vnnd haben
Begenad dem Selbigenn Czyns vns vnd vnssern Nachkumenlegen zw
gebenn nemlich ffur yedenn Scheffel kornn iiij alb(er) d(enar) den gl(os) zw viij
d(enar) gereith vnnd ffur yedenn Scheffel habernn zw ij alb(er) d(enar) vnd der
Czynss sol also stete Bleibenn ymer vnnd ewicklich vnnd nimmermer
verwandt werdenn des zw einem waren geczeugnuss vnnd
Bestetiget hab ich abgemelter Johannes prior mein aygenn Insigel thun
Stat des Ganczen Conuents wissintlich hab lassen vnderdruckenn
Ihn diessem Brieff Datum Gewicz Sub Anno 1484 fferia
fferia p(os)t Corporis Christi Darbei ist gesessenn der Richter von dem
dorffles mit Namen der lobisch valten von dem dorffles der warrer aus der
Gewicz ffleischer vnd lönz Iakuba von der Grün