Ich Jan Baldat die czeit des hochgeborn fursten Margrauen Joste hoffgesinde Kunigund sein hawsfraw Bekennen offentlich
mit disem briene allen den die yn seheen odir horen lesen das wir mit gueter vornufft vnd mit bedachtem muete vnd willen kacht
vnd redlichen dem andachtigen herren h(er)n ffranken Bruder des closters sand Thoman czu Brinne fur sein letilich erbe gebn
vnd czu aygem Vnd dem Ganczen Conuent des selben closters Vnsir funff hewsir mit vyer vnd sybenczig gross vnd virczehn
huner Jerlichs erbczinses die auff den selben hewsir sind vnd die gelegen seyn vor frolicher tor am ende bey der gassen die
genant ist die new stift erblichen czu behalden dem vorgenante(n) franken sein lebtage vnd nach seim tode dem conuent czu
behalden czu vorkawffen vorseczen odir vorloes(e)n vnd iren frum da mit schaffen nach all irem willen mit allen iren
nuczen rasten czu gehorung vnd aygenschaft als wir sie gehabt haben vns noch vnsern erben noch nachkomling doran nichte
czu behalden noch außgenomen dar vmb globen wir vorgenanten Jan vnd kunigud mit aller vnser hab varund vnd vnvarund
wo wir die haben dem vorgenante(n) h(er)n franken vnd dem conuent die selbn funff hewsir mit allen iren czugehorung freyen
ledigen vnd vor allirlay anspruch beschirmen bey vnsern trewen vnd eren Vnd des czu vrkund hab wir Jan vorgenater meyn
aygen Jngesigel vnd czu geczewknisse habn die weysen mane durch vnsir pett willen Johannes lubner vnd herman(n) taschner
die czeit gesworn der Stat czu Brinne ir Jnsigel an disen brieff gehangen der gebn ist nach christi gepurt Tawsand
Jar dreyhundert Jar vnd in dem czway vnd newnczigistem Jar an sand Gallen tag (et)c(etera)