Sigmund von gotes gnaden Romisch(er) kunig zu allenczeiten
merer des Richs vnd zu hung(er)n zu Behem (et)c(etera) kunig

~Lieben getrewen~ Wir lassen euch wissen das wir nu gen merh(er)n wartz zuzihen vnd auf volk gewartten teglich fur
vns dahin / vnd dorumb haben wir lassen die lanth(er)ren Ritt(er) vnd knecht vnser marggraffschaft zu merh(er)n
besenden das sy alle den donnerstag nechstkunfftig vberachttag gen Straznicz komen dahin wir vnser bot
schaft vnder sy senden wollen vnd selbs wellen wir ob got wil zu Skalicz syn vnd von solich(er) teiding wegen
merker wir das wir ewer by vns wol bedurffen dorumb begeren wir von euch vnd wollen ouch ernstlich
das ir zwen ew(er) freunt zu vns vf denselben tag gen Skalicz sendt die ouch by den teidingen syn
vnd horen wes wir mit den lantherren vnd lantleuten vberkomen wann wir der sachen ye eyn ende
haben wollen vnd meynen ew(er) sachen also bestellen das ir die so vil von den willeffen geliden habet
des furbas entladen vnd ewers vngemaches also ergetzet werdet das euch billich sol erfrewen
das ir in cristlich(e)m gelauben vnd bey vns als bey ew(er)m erbherren syt getrulich bestanden Geben
zu Ofen am montag nach sant Bartholomeus tag vns(er)r R(e)iche des vngerisch(e)n (et)c(etera) in dem
xxxv des Romisch(e)n in dem xi vnd des Behemisch(e)n jm and(er)n Jaren

Ad mandatu(m) d(omi)ni Regis
Mich(ael) p(rae)p(osi)t(us) pragen(sis)