Ich Beness von Bozkowicz die zeit Vnder Cam(er)ma(ist)er In Merh(e)n Bekhenn mit disem brieff vor allen
lewt(e)n gegenburttigen vn(d) zükunfftigen, Das Jch vo(n) den Ers(amen) vn(d) weisen ma(n)nen dem Burg(er)maist(er)
vn(d) von dem Rate der Stat ze Znoym am Erita(g) nach aller Seltag Nach cristi gepurd In dem
vierzehenhundertisten Jar vnd darnach in dem vierdem vnd vierczigistem Jar Sider des mitichs
vor sant Matheus tag des vorigen Jares dar In sy ambt gewert hat Jch obgenanter beness
hab ain gancze vn(d) volku(m)ne raytung vo(n) In aufgenomen Also das alle Ir einnemu(n)g vnd
eynnemu(n)g in der Stat Rat gepracht Sibenhu(n)dert vn(d) achczehen schok g(ro)ss(en) xv g(ro)ss(en) vij d(enari)
Vnd daengegen hat alle Ir aufgeb(un)g geleich also vil gepracht als die eynnemu(n)g Alle die
zeyt so si pey dem Schophambt sint gewesen, Dapey si auch der Stat die alte vn(d) die new
schuld gemeldet haben, die aygentlich in Iren Registern bewis(e)n vnd vermerkt sein Darob
der vorgeraten raytu(n)g so si getan habent volku(m)lich, daran mich auch wol genigt
Sag Jch vorgerater Beness Als mir die allerdurchleuchtigiste furstin vnd künigin fraw
Elizabeth vo(n) Gotes gnaden ze Vngern Dalmacien Croacien (et)c(etera) künigin Erberin fraw ze
Behem Herczogin ze Osterr(eich) ze Steyer (et)c(etera) vn(d) Markgraffin ze Merh(e)n mein gnedigiste fraw
als si noch in dem leben ist gewesen bevolh(e)n hat Vn(d) vo(n) meines Camermaistertu(m)bs ambt
Sag die vorgenanten Burg(er)maister vn(d) den Rate gancz vn(d) gar quidt ledig vn(d) loas Mit vr/
kund des brieffes besigelt mit meim aufgedruktem Insigel Geb(e)n ze Znoym am Erita(g)
nach aller Seltag Anno d(omi)ni M(illesim)o cccc(m)o xliiij(t)o (et)c(etera)