Innocentius episcopus seruus seruorum dei dilectis filiis .. priori et conuentui monasterii sancte trinitatis prope Brunnam Cartusiensis ordinis
Olomucensis diocesis salutem et apostolicam benedictionem. Cum a nobis petitur quod iustum est et honestum, tam uigor equitatis quam ordo exigit rationis, ut id per sollicitudinem
offiicii nostri ad congruentem effectum perducatur. Eapropter, dilecti in domino filii, uestris iustis postulationibus grato concurrentes assensu, omnes
libertates et immunitates a predecessoribus nostris Romanis pontificibus siue per priuilegia uel alias indulgentias uobis et monasterio uestro concessas, necnon
libertates et exemptiones secularium exactionum a regibus et principibus ac aliis Christi fidelibus rationabiliter uobis et eidem monasterio indultas, sicut
eas iuste et pacifice obtinetis, uobis et per uos eidem monasterio auctoritate apostolica confirmamus et presentis scripti patrocinio communimus.
Nulli ergo omnino hominum liceat hanc paginam nostre confirmationis et communitionis infringere uel ei ausu temerario contraire. Si quis autem
hoc attemptare presumpserit, indignationem omnipotentis dei et beatorum Petri et Pauli apostolorum eius se nouerit incursurum. Datum Auinione
ii. nonas maii, pontificatus nostri anno decimo.
Nos Iohannes dei gratia sancte Pragensis ecclesie archiepiscopus, apostolice sedis legatus, uisis et diligenter inspectis litteris apostolicis suprascriptis, non
uiciatis, non cancellatis, nec in aliqua sui parte corruptis, sed prorsus omni uicio et suspicione carentibus, ad instantem petitionem dilectorum
in Christo filiorum .. prioris et conuentus monasterii sancte trinitatis prope Brunnam Cartusiensis ordinis Olomucensis diocesis, easdem litteras
apostolicas per notarium publicum infrascriptum transumi, exemplari et in publicam formam redigi mandauimus, decernentes ut transumpto
huiusmodi siue exemplo plena fides adhibeatur in iudicio et extra, ubi illud exhibitum fuerit uel ostensum, sicut ipsis originalibus litteris
apostolicis adhiberetur, si in medium proferrentur. In quorum omnium et singulorum premissorum testimonium atque fidem presentes litteras
siue presens publicum instrumentum exinde fieri et per notarium publicum infrascriptum subscribi et publicari mandauimus nostrique sigilli
appensione fecimus communiri. Datum et actum in castro nostro archiepiscopali Rudnicensi, anno a natiuitate domini millesimo trecentesimo
octuagesimo tertio, indictione sexta, die prima mensis iulii, pontificatus sanctissimi in Christo patris et domini nostri domini Urbani diuina
prouidentia pape sexti anno sexto, presentibus uenerabilibus et discretis uiris dominis Iohanne decano ecclesie sancti Apollinaris Pragensis,
Iohanne plebano in Zacz, et Iohanne de Wissegrad clerico Pragensis diocesis, testibus ad premissa uocatis specialiter et rogatis.
Et ego Wenceslaus quondam Pauli de Endeg, clericus Patauiensis diocesis, publicus imperiali auctoritate notarius, quia predictarum litterarum
apostolicarum presentationi, uisioni et inspectioni, necnon mandati et decreti interpositioni omnibusque aliis et singulis premissis, dum sic
ut premittitur per reuerendissimum in Christo patrem et dominum, dominum Iohannem archiepiscopum et legatum predictum agerentur et fierent,
una cum prenominatis testibus presens interfui, eaque sic fieri uidi et audiui, ideo has presentes litteras siue presens publicum instrumentum
per alium, me aliis arduis negotiis occupato, fideliter scriptum exinde confeci, subscripsi et in hanc publicam formam redegi, signoque
et nomine meis solitis et consuetis signaui, in fidem et testimonium omnium et singulorum premissorum, rogatus et requisitus.