Wir Maximilian von gots gnaden Erwelter Römischer Kaiser, zu allen zeiten merer des Reichs, in Germanien, zu Hungern, Dalmatien,
Croatien etc. Künig, Ertzhertzog zu Osterreich, Hertzog zu Burgundi, zu Brabant und Pfaltzgrave etc. Bekennen offenntlich mit disem
brief und thuen khundt allermeniglich, das wir unnsern und des Reichs lieben getrewen Philipsen Ertztern zu Droschl, prim(us) des Cectory, umb
seiner redlichait, schicklichait und der angenemen getrewen und nutzlichen dienst willen, so Er unns und dem Heiligen Reich in manig=
faltig weise offt willigclichen gethan und erzaigt hat, und hinfüran wol thuen mag und soll, mit sambt seiner Hausfrawen, kinden, haben
und güetern in unnser und des Reichs sonnder gnad, versprechung, schutz und schirm aufgenomen und empfangen haben, nemen und em=
pfahen Ine auch also von Römischer kaiserlicher macht, wissenntlich in chrafft ditz briefs, und mainen, setzen und wellen, das Er
im hinfüro unnser diener, und darzue mit sambt seinem leib, Hausfrawen, kinden, haben und güetern, in unnser und des Reichs
sonnder gnad, versprechung, schutz und schirm sein, Auch all und yegclich gnad, freyhait, Ere, wird, vortail, Recht, gerechtigkaiten und ge=
wonhaiten haben, und sich der frewen, geprauchen und geniessen soll und mag, als annder unnser diener, und die so in unser
und des Reichs sonnder gnad, versprechung, schutz und schirm sein, haben, und sich des alles frewen, geprauchen und geniessen,
von Recht oder gewonhait, von allermeniglich un~ge~hindert, ungeirrtlich. Und gepietten darauf allen und yegclichen
Churfürsten, Fürsten, Gaistlichen und weltlichen, Prelaten, Graven, Freyen, Herren, Rittern, knechten, Hauptleuten, Vitzthumben,
Vogten, Pflegern, verwesern, Ambtleuten, Schultthaissen, Burgernmaistern, Lanndtrichtern, Richtern, Räten, Burgern, Gemainden,
und sonnst allen anndern unnsern und des Heiligen Reichs unnderthanen und getrewen, in was wirden, stats oder wesens
die sein, ernnstlich und wellen, das Sy den genanten Philipsen Ertzter zu Droschl, prim(us), für unnsern diener, Eeren, achten und
halten, und Ine, sein Hausfrawen und kinder, an den obgemelten unnsern kaiserlichen gnaden und freyhaiten, nit Irren
noch hindern, sonnder der gerüeblich geprauchen, geniessen, und genntzlich dabey beleiben lassen, und Ine, sein Haus=
frawen, kinder, hab und güeter, dawider nit dringen, bekümern, aufhalten, belaidigen, noch besweren, noch das yemannds zuthuen
gestatten in khain weise, als lieb ainem yeden sey, unnser und des Reichs swer ungnad und straff zuvermeyden. Das mainen
wir ernnstlich. Mit Urkhundt ditz briefs. Geben zu prüssell in Brabant am sibennden tag des Monats Juny,
Anno domini Fünfftzehenhundert und im Zwelfften, Unnserer Reichs des Römischen im Sibennundzwaintzigisten,
und des Hungerischen im Dreyundzwaintzigisten.
Ad mandatum d(omi)ni
Imperatoris p(ro)p(rium)
K
Renner