Wir Dorothea Ebtessin Anna priorin vnd der gancz conuent des klosters czu Osslau sand Bernhards
orden Olomuczer Bistum Bekennen offenlich mit dem brif vor aller meniklich das wir dem beschaiden
manne Peter krewczer Margarethen seiner hawsfrawen yeren geerben vnd nachkumen verkawft haben vn-
sern hof gelegen czu Nempczicz mit dreyn lehen akkers mit wisen mit czuluffen vnd mit aller seiner czu
gehorug dy von alder bis hieher dorczu haben gehort vns nichtz doran ausgenomen vmb czweinczik schok
grossen dy wir nun gancz vnd gar eingenomen haben von in doch in sulcher masse vnd berednisse das vns
dy egen(anten) Peter krewcz Margareth yr geerben vnd nachkumen Jerlich cynsen sullen ein halbe mark grossen czu
sand Jorgen tage vnd czu sand Michels tage auch ein halbe mark grossen rechtes cynses vnuczogenlich vnd
sust sullen sy den hof frey haben vnd besiczen vnd sullen ledig sein robott landstewr aller gab vnd aller
beswerug vnd sullen vns von dem hof nichtz mer gepunden sein wen dy obengeschriben mark cynses Auch
sullen dy Nempcziczer in an kainerley geweltig sein vnd wer das das sy in schuld viellen vmb das mugen
wir sy straffen vnd nicht dy Nempcziczer Auch sullen dy obgeschriben Peter krewczer sein hawsfraw vnd yr
geerben in kain andre herschaft suchen vor vns Auch mugen sy den hof mit seiner czugehorug verseczen
verkawffen vgeben od(er) vschaffen wem sy wellen der ein frumer tuglicher man wer in sulchen rechten als
sy in ynne haben des czu einer pesser(n) sicherhait haben wir vnser(n) Ingsigel gehangen an den brif der gebe(n)
ist nach cristi gepurd vierczehenhundert dornach in dem czehenden Jare des phincztages vor sand
Michels tage