ICh Swester Eufemia Gotzhawsfraw die Zeit priorin vnd der gantz Conuent des klosters Zu Sand Anna In der alten prun predeg(er) ordens. bekennen
offenlich mit disem brieff fur vns vnd all vnser nachkomen vor allen. dy In sehn oder werden horen lesen. Das von wegen klayner nutz. sunder der
grossen schaden dy vns Jarlich geschehn an vnserm holtz genant. dy wiegen lepten bey vnserm dorff zu Gyt vnd gar zu ferr von vnserm kloster gelegn
ist. wir nach rat frumer lewt vnd gueter gunner vnterweysung mit wolbedachtem mut. dasselbig holtz verlichn habn vnd verleyhen auch In krafft
dis brieffs vnsern lewten Im dorff zu dem vntern Blasiwitz vnd der gantzen gmayn daselbs vnd allen yren nachkomen. Dar vmb sie vns vnd
vnsern nachkomen Jarlichen zyns raichen sollen durch vnsern richter daselbs zw vnser frawen liecht mess ain halbe schock gr(oschen) Merherisscher zalung
vnd werug on alles verziehn. Vnd wie dasselbig holtz Nun ist aufgetailt wordn zu aym ytlichem lehn. also sol der selbig tail zu koren ewigklich zu
zu dem selbign lehn. vnd allain dar zu gepraucht werdn zu prenn holtz vnd paw oder pesserug der hewser. Es sol auch kayner aus seinem tail holtz hyn
dan verkaufe. noch ayner dem andern schaden tun. Vnd welcher erfunden wurd der anders getan hett der sol dem richter verfallen sein als offt zu wandl
funff gr(oschen) vnd vns ein halbe marck. vnd dar zu genug tun vmb dy schaden nach erkentniss des Richters vnd Schoppn dasselbs. Vnd als offt es redlich vnd
genugsamlich erfunden oder bewaist wurd das vnser Richter vnpilleich nachlessig oder sawmig wurd sein In den dingen als offt sol er schuldig sein zu
antwortn vor vns vnd vnserm schaffer vmb solich wandel vnd dar zu selbs genug tun vmb dy schaden. Auch bekennen wir offenlich mit disem brieff
das vnnser Taich den wir habn machen lassen daselbs bey dem vntern Blasiwitz etlichen aus vnsern lewten an yren lehen vnd veld hat schaden getun mit
aufstrencken. das wir In trewlich ein genuegn tun habn nach frumer lewt will kur vnd nach des lannds gerechtigkait vill mer dan zwir als vill verlichn habn
In fur vnd verleyhen auch In krafft des brieffs als dreyssigk gwantn veld. dy man nent dy Greuch lissen gelegn. gegen Krenewitz vber. vnd habn vorhyn gehort
zu dem obem Blasiwitz vnserm dorff daselbs. das vil Jar pis her oed gelegen ist. dar an sie auch all ein guets genugen gehabt habn. Vnd wye dy selbigen
gwantn veld synd aus getailt wordn zu aym ytlichen lehen nach dem als grosser oder klayner schadn dar an geschehn seyn. also sol dyselbig taylung stät be=
leibn. vnd ein ytlicher solicher tail sol ewigklich hinfur dar zu koren vnd do von nymer geschaiden werdn. Des alles zw warer vrkund vnd bestatigung
Gebn wir dysen brieff dem Richter Schophn vnd der gantzen gmayn In dem selbign vnserm dorff. vntern Blasiwitz Mit vnsern paydn obgenanten der
Priorin vnd Conuents anhangendn Insigel. Dat(um) am Sontag vor Natiuitat(is) Marie Anno d(omi)ni M^o cccc^o lxxxx^o :~