Ich Brueder Pawl der heyligen Geschrifft Baccalarius die zeyt Prior des wirdigen Con=
uents Czw Sanndt Michel zw Prinn Prediger Ordens Brueder Martinus auch Baccalari(us)
dye zeyt Supprior Brueder Johannes lesmayster vnd der ganntz Conuendt Bekhennen offentlich
mit disem brieff wer in lesen wirdt oder horet lesen das wir aintrechtigklichen mit guetter vernunft
vnd Radt vnd mit willen vnd wissen des Hochwirdigen Vatter Prouincial Vatter Walthasar
Meindl der heyligen geschrifft Doctor haben abgetreten den Erwirdigen Junckfraw zw vnnser
lieben frawen mit namen Swester Herberg gelegen in der weittn gassen dy Sechs Marckh dy sy
vns Jerlich geben haben von Steur nach Innhalttung des brieffs vnd gescheffts des Wirdigen
Vatter Luttery dem gott genadt dy zw geniessen vnd zw geprauchen an alle wider redt vnd
widerrueffen Darumb wir sy frey vnd ledig sagen zw ewigen zeytten vnd vns khayn freyhait
mer verhallten Yecz vnd In khunfftigen zeytten noch vnnsern nachkhumen Vnd das darumb
wen sy vns auch herwider abgetreten haben dy Pfarr zw Muttnicz dy den In von allter her
Zuegehordt hatt Nach gabung kayserlicher vnd kunigklicher Mayestatt Auch bestettung des
heyligen Vatter Babst Auch verpflichtt wir vns das wir dy nicht wellen streyten sunder pes=
sern vnd In Irer gerechtigkhayt Zweruordern vnd ob wir soliche lehenschafft vnd annder
guetter dy wir von allter her von In entpfanngen haben woldten verandern vnd sy soliche
widerumb woldten an nemen So soldten wir dy selbigen khaynem anderm wen In vnd Irem Con=
uendt lassen Zuesten vnd vergunnen mit aller gerechtigkhayt gniesz vnd prauch wie wir von
In entpfangen haben So fer was guet lewth erchennen In vnd vns vnd vnnserm Conuendt
anbeswerung Des Czw Vrkundt Pesser bestettung Ist vnnsers hochwirdigen Vatter Pro=
uincial vnd des Vatter Prior vnd vnnsers Conuendt Insigel disem brieff angehanngen war=
den Beschehen am Erichtag Philippi vnd Jacobi der heyligen zwelffpotten Als man zellt nach
Crysti vnnsers lieben gepurde Im funffzehenhunderttisten vnd Im zwainczigisten Jare