Wirlasslaw von gots gnaden zu Hungern zu Behem Dalmatien Croatien (et)c(etera) kunig Herczog zu Oster
reich vnd Marggraue zu Merhern (et)c(etera) Entbieten den erbern weisen vnsern lieben getrewen dem Burger
maister Richter vnd Rat vnser Stat hie zu Brunn die yecz sind oder wer die kunfticlich werdent vns(er)
gnad vnd alles gut, Wan die erbern geistlichen vnser andechtigen die klosterfrawn zu sand Marien
Zell von vnsern vordern kunig(e)n zu Behem vnd Marggrauen zu Merhern begnadt vnd gefreyt sind
daz sy vnd ir Gothaws lewt hie gesessen vnd wonhafft auf den Mærhlehen in der Stat alle Recht
haben als annder mit der Stat in losungen Zinsen vnd anndern sachen nicht pflichtig sein zelaist(e)n
nach irer brieff sag so sy darumb haben Maynen wir daz sy selher irer gnaden vnd freyhait yecz
vnd hinfur auch geniessen dabey beleiben vnd daran nicht gedrungen noch beswert werden in
khain weis, Dauon emphelhen wir ew ernstleich daz ir die obgenant(e)n klosterfrawn vnd
ir lewt in der Gruben vnd in der Hatergassen hie gesessen bei iren obgemelt(e)n freyhaiten vnd
Rechten gutlich haltet vnd beleiben vnd ew sy beuelhen sein lasset, Daran beweiset ir vns
gut geuallen vnd ist vnser maynung Geben zu Brunn an sand Jacobs tag im Jare Nach
Cristi geburde im vierzehenhundert vnd drewundfunfczigsten Jare vnser künigreich vnsers
Reichs des hungrischen im vierzehennten Jare

Comissio d(omi)ni
Reg(is) p(er) consiliu(m)