NOS FERDINANDVS
SECVNDVS DEI GRATIA ROMANORVM
Imperator, Semper Augustus, ac Germaniæ, Hungariæ, Bohemiæ, Dalmatiæ, Croatiæ, et Sclavoniæ REX, Archidux Austriæ, Marchio Moraviæ, Lucemburgensis et Silesiæ
Dux, Marchioq(ue) Lusatiæ. Ad perpetuam rei memoriam. Notum facimus, et recognoscimus Nostro, Hæredumq(ue) Nostrorum, Successorum Regum Boëmiæ, et Moraviæ Marchio=
num nomine, Vniversis et Singulis, quibus expedit, præsentibus, et futuris, tenore præsentium memoriæ commendamus. Cum Imperatores, Reges, et Principes, Christiani muneris
sui ratione teneantur, non tantum Subditorum Saluti consilio, et armis prospicere, eaq(ue) quæ ad Statum Reipublicæ, pacisq(ue) et tranquillitatis conservationem pertinent, curare:
Verumetiam ea quæ ad propagandam et tuendam divini nominis gloriam, nec non augmentum veræ, Sanctæq(ue) Religionis Nostræ Catholicæ Apostolicæ Romanæ spectant, diligenti
sollicitudine et indefesso studio promovere. Sanè equidem, cum Maiestati Nostræ Cæsareæ Regiæq(ue) humillime expositum sit, qualiter Collegium Societatis IESV Olomucense
ab eius primo fundatore Guilielmo Prussinowsky de Wiczkowa olim Episcopo Olomucensi, bonæ memoriæ, non ita amplo censu et reditu fuerit dotatum, ut plures inde prædictæ Socie=
tatis Religiosi, qui in Academia ibidem erecta, institutioni Iuventutis (cuius copiosum illò confluere semper numerum intelleximus) vacant, aliaq(ue) Ecclesiastica Sacra munia pro eorum
instituto sedulò exercent, ali, sustentariq(ue) queant; ac proinde demissè Nobis extiterit supplicatum, quatenus de innata Nobis benignitate, clementiaq(ue), memoratis Religiosis de meliori
sustentatione providere clementer et gratiosè dignaremur. Nos considerantes prædictæ Societatis, in vera pietate propaganda industriam, et in disciplinis liberalibus Iuven=
tuti tradendis diligentiam eximiamq(ue) ex eorum instituto quotidiè in bonum tam Reipublicæ quam Ecclesiæ Sanctæ promanantem fructum, dignum omninò iudicavimus, ut eosdem
Societatis Religiosos favore nostro munificentiaq(ue) Imperiali ac Regia pro ipsorum merito prosequeremur, amplioribusq(ue) censibus in hisce Nostris hæreditarijs Provincijs augeremus.
Quapropter non per errorem, aut improvidè, sed animo deliberato, sano, et maturo Procerum, aliorumq(ue) Fidelium Nostrorum accedente consilio, authoritate Regia, tanquam Boë=
miæ Rex, et Marchio Moraviæ, eidem Collegio Olomucensi Societatis IESV, pro pleniore eiusdem fundatione Dominium Ceykovicense in præfato Marchionatu hæreditario Nostro
Moraviæ situm, et propter crimen Rebellionis, Perduellionis, læsæq(ue) Maiestatis, a Ioanne Adamo Prussinowsky de Wiczkowa commissum, Nobis et fisco nostro Regio adiudicatum, cum
omnibus et singulis pagis, prædijs, Subditis, domibus, pratis, agris, Sylvis, pascuis, vineis, piscinis, aquis, Privilegijs, immunitatibus, et Iuribus, atq(ue) alijs pertinentijs mobilibus, et
immobilibus nihil penitus excepto, pro ut hoc iam dictus de Wiczkowa olim possedit, et ad Nos devolutum est, absq(ue) omni debitorum quibus præfatum illud Dominium obæratum
fuit onere, ex libera et munifica voluntate nostra donavimus, et contulimus, sicuti tenore præsentium damus, donamus, conferimus, et elargimur in perpetuum, liberè, quietè, et
pacificè possidendum: Et ita quidem, ut dicti Collegij Societatis IESV Patres, plenum et absolutum Ius potestatemq(ue) habeant, habituriq(ue) sint de hoc Dominio, prout ad
inclitæ Societatis bonum esse, ipsius Societatis Superiores iudicaverint, tanquam de re sua, quocunq(ue) modo vel via libere absolutèq(ue) disponendi. Superioritatis tamen Domi=
nio et alijs respectibusq(ue), qui Nobis, hæredibus, et Successoribus Nostris, Regibus Boëmiæ, et Moraviæ Marchionibus, nomine dicti Marchionatus et Patronatus Iure, in præmissis compe=
tunt semper salvis. Quocirca requirimus Serenissimos filios, hæredes, et Successores nostros Reges Boëmiæ, et Moraviæ Marchiones, eisq(ue) gratiosè et paternè committentes
Subditis vero nostris cuiuscunq(ue) ij status, gradus, ordinis, conditionis, seu præeminentiæ extiterint, præcipuè autem Gubernatori, vel Provinciæ Capitaneo, alijsq(ue) Officialibus
nostris, præsentibus et futuris, firmiter et distinctè præcipientes mandamus, ut hanc præsentem liberam et voluntariam donationem et constitutionem nostram diligenter et fi=
deliter manuteneant, et observent, nec non sæpedictos Patres quieta et pacifica possessione omniumq(ue) præscriptorum Iurium usu pacificè gaudere sinant, eosq(ue) contra malevolo=
rum, et inquietorum hominum perturbationes, et vexationes efficaciter tueantur atq(ue) defendant. Secus sub animadversione nostra, hæredumq(ue) et Successorum nostrorum gra=
vissima nequaquam facturi. Vt autem hæc omnia firma et rata permaneant, plenumq(ue) et inviolabile robur et testimonium perpetuò valiturum habeant, Diploma hoc
nostrum Regium, manu nostra propria subscriptum, et Sigilli nostri maioris appensione munitum, super his fieri, et præfato Collegio Olomucensi assignari iussimus.
Ferdinandus
Ad mandatum sacræ Cæs(areæ)
Maiestatis proprium
Ioannes Walderode