Wir Burgermeister, Rathmanne, sampt allen Zünfften vnndt Zechen der ganzen Gemaine dieser Stadt
Newtitschein, bekennen hiemit offentlichen, vnd vor Jedermänniglichen vor vns, vnd vnsere Nachkommen, dz nach deme nu mehr von vnser lieben Hochgeehrten
Obrigkeit in bey sein, vnd gegenwart, Ihr Gnaden, der Hochwürdigisten Wolgebornen Herrn, Herrn, Philipp Friederich Breynern, Freyherrn zu Stübnick,
Schladnig, vnd Rabenstein, Ihr Bapstlichen Heyligkeit, Cämmerern, Probsten in Brünn, der Thumbkirchen zu Ollmütz Archidiacon, Ihr Hochfürstlichen
Gnaden, Rhat, Cämmern, vnndt Verordneten Suffragan; dann auch, den WolEdelen, Gestrengen Herrn, Hannß Felix Podstatsky auff Prusinowitz, Boden=
stat, Liebenthal, vnd Barthendorff der Röm: Kay: Mayt(estät) Rhat, vnd küniglichen Obristen Landtschreybern im ErbMarggraffthumb Mährern, vnsere
Gemainer Stadt Privilegium wider verhoffen, vnd verdienst, auß lauter Gnade, vnndt Barmhertzigkeit, vns nicht aus vorst von newen concediret, vnd geben worden
dz Wir solches nicht allein, mit höchster danckbarkeit angenomen, vnndt Empfangen, sondern auch solches mit gehorsamesten trewesten diensten, vnd vnterthänigkeit
zuverdienen, willig vnd pflichtig vns erkennen. Geloben, vnd Versprechen hiemit, wider das, aus Gnaden Erthailte Privilegium nimmermehr zu handlen, sondern
stät vest, vnd vnverbrüchlich solches zu halten; Auch nicht Allein, bey der Allain seligmachenden Catholischen Religion, mit weib, kind, vnd gesind bis an vnser Ende
bestendig zuverbleiben, Auch wegen in Bürgerrecht, Zünfften, vnd Zechen, Einen Mann außzunehmen, so nicht derselbigen Religion zugethan, Sondern
auch zu wahrer Recognition, vnd Erkantnüß, dieser grossen Gnade, vnd erthailten Barmhertzigkeit Järlich, güttwilliglich verwilliget, von 20. Mann, ein
Stück Herntüch, wz vor farben begeret werden, dem Kayserlichen Alumnat, zum besten zu geben. So bewilligen wir auch, dz vnser liebe Obrigkeit, macht haben
solle, von vnserem Wittib, Mitbürgern, vnnd Wäysen, besonders die jenigen, welche aus andern herschafften dienen solten, oder wolten, zu denen diensten, vmb billi=
chen belonung zuerfodern, vnd anzunemen, welche sich alsdan auch güttwillig gebrauchen lassen sollen, Auch den billichen, vnd Landtbreüchlichen Taxa, vnd wehrt na=
her, das Geträyde, Viehe, fisch, Bütter, Käß, vnd dergleichen, der Obrigkeit auf leidentliche termin, vnd Zeit zuversilbern; So sollen auch vnsere
Handtwercksleüte, alle Arbeit, so sie der Obrigkeit, oder dem Alumnat machen, in einem leidentlichen Preiß geben; Wann auch vor abzalung, dero
Stadtschulden ein Bürger abziehen wolte, solle solcher die helffte, seines Vermögens zu abzalung der frembden Schulden, der Obrigkeit lassen; Vnnd solches
zu mehrerer versicherung, vnd besseren Bekräfftigung, ist alles mit güttem bedacht consens, vnd bewilligung aller Drey Räthe, aller Zünfften, vnndt
Zechen, dieser Stadt Newtitschein, auff dz Papir bracht, mit der Stad, vnd aller Zechen Insiegel bekräfftiget worden. Geschehen in
New=Titschein, den 18. Octobris. A(nn)o 1629. Jahrs.