Wir Wilhelmb des Hey(ligen) Röm(ischen) Reichs Graff Slawata
Regierer deß Haußes Neuhaus von Chlumb vnd Koschenberg Herr zue Neuhaus Serowitz Rothen Lhotta vnd Teltsch Ritter deß Guld(e)
nen Vließes Rom(ischer) Kay(serlicher) May(estät) würcklicher Geheimer Rath Cämmerer Ihr May(estät) alß Königs zu Böheimb Obrister Cantzler vnd Obrister Erbschenck deß Königreichs Böheimb. Bekenne vnd thue hie
mit Kundt Jedermänniglich für mich meine Erben vnd Künfftige Inhaber der Herschafft Teltsch Daß die HochvndWolgeborne Fraw Fraw Francisca Gräfin Slawatin Wittib ein geborne Gräfin von Meggaw vnd
der Zeit Regierende Fraw der Kayserlichen Pfandt Inhabenden Herschafft Freystadt den Newen Hoff Wesely genandt in der Vorstadt zu Teltsch liegent (welchen der Edle vnd Gestreng Ritter Herr Hynneck Ladislaw von der
Weitsmühl mein gewester OberHaubtmann der Herschafft Teltsch auffgebawet) mit meinen wißen vnd willen Vnd zwar von dem Edlen vnd Gestrengen Herrn Johann von der Weitsmühl alß der denselben Vi Testamenti Ererbet
mit allen Zuegehörungen erkaufft vnd an sich gebracht. Aldieweiln nun die gantze Zeit hero wegen gedachten Hoffs sowol Ime Herrn Hynneck Seel(igen) alß seinen Vettern Johann beyden von der Weitsmühl die von mir allß
Grundtherrn zustehendige vnd allerley gebührende Schuldigkeiten (alß da seindt zu S(anct) Georgij vnd S(anct) Gallj stette Zins Wachten Logierung der Soldaten auch allerhandt gaben) auß lautterer gnad nachgelaßen worden sein Alß
habe Ich vielmehr Vrsachen solches meiner vielgeliebten Fraw Tochter auff Ihr gehsames ansuchen zuerweisen vnd in optima forma zuestettigen welches Ich dann mit dieser meiner Handtfest würcklich volzogen haben will alß
nemblich offtgedachter Hoff darinn in erbauung deßelben vnterschiedtliche Kleine Häußl vnd Kaluppen begriffen auch alle Äcker die sich der zeit darbey befinden vnd vnter Exmainer Stadt Insiegel in specie beschrieben sein
Hinführo vnd zu ewigen zeitten der S(anct) Georgi vnd S(anct) Galli Zinsen so sich auff Zwey Schock Viertzehen groschen belauffet Item des Zinßhaaber deßen außtragung bey Ailff Metzen sein soll deß desent abrichtung Robathen Wacht
Einlogierung der Soldaten vnd allerhandt gaben vnd schuldigkeiten wie die Nahmen haben mögen denen die Nachbarschafft der Stadt Teltsch vnterworffen sein thun gentzlich befreyet vnd aller beschwerlichkeiten enthebt
vnd hiemit vollkommentlich cassirt sein solle Vnd gebe auch hierüber meiner geliebten Fraw Tochter diesen absonderlichen Gewalt daß Sie gedachten Hoff in die Landttaffel deß Marggraffthumbs Mähren einlegen laßen
vnd denselben nach Ihren selbst aigenen wohlgefallen veralienirn vnd ohne männiglichs einreden auff angezogene weiß vnd manier verschencken kan also vnd dergestalt daß alle die Jenigen so denselben (es seye auch mit was Recht
vnd fueg) an sich bringen werden diese Freyheit haben vnd dieselben zu Ewigen zeitten genueßen sollen vnd mögen. Befehle hierauff allen ietzigen vnd künfftigen Haubtleuthen vnd Verwaltern gedachter Herschafft Teltsch
daß Sie vber diese meine mit gueten wohlbedachtsamben willen ertheilte Freyheit Handt halten darwieder weder selbst Handlen noch einem andern solches zu thuen gestatten Zue mehrer Versicherung deßen habe Ich den HochvndWolgebor
nen Graffen vnd Herrn Herrn Ferdinandt Wilhelumben deß Heyligen Römischen Reichs Graffen Slawata von Chlumb vnd Koschenberg Herrn auff Platz Rom(ischer) Kay(serlicher) May(estät) Rath vnd Obristen LehenhoffRichtern im Königreich
Böheimb wie auch der zu Hungarn vnd Böheimb Königl(ichen) May(estät) würcklichen Cämmerern meinen Hertzliebsten Enenghl alß nach meinen zeitlichen hintritt rechtmäßigen Erbherrn zu Teltsch erbetten daß Er sich neben mir (in
diesem Handtuest) mit aigener Handt vnterschrieben vnd sein Insiegl anhangen laßen. So Geben vnd geschehen in Wien am Tag S(anct) Galli den Sechzehenden Nouembris deß Sechzehenhundert Ein vnnd Fünfftzigisten Jahrs
Wilhelm Graff Slawata mp
Ferdinand Wilhelm Graff Slawata mp