Wir Sygmund von gotes gnaden Romischer künig zu allen zeiten Merer des Reichs vnd zu Vngern zu Behem Dalma
tien Croatien etc(etera) künig Entbieten vnserm lieben getreuen Hanusken von Policz vnser gnad vnd alles gut lieber
getreuer Als wir dir einen teil vnserr mül zu Brunn an der zeile vmb dritthalbhundert Schok Behemischer
grossen vnd den andern teil vnserm lieben getreuen Buben warleich versazt haben vff vnser widerlosung Also ha
ben wir nw fur vns genomen dieselb mül mit jren nuzen von dir zulosen lassen wan sy in eyner hand vil
paß dann in czweien mag verweset werden vnd haben dem egen(anten) Buben warleich beuolhen vnd volle macht ge
geben daz Er von vnsern wegen an vnser stat denselben teil der mülen zu Brün von dir vmb die vorgen(anten)
dritthalbhundert schok grossen losen vnd dir die betzalen sol Darumb heissen beuelhen vnd gebieten wir
dir ernstlich mit disem briefe wen dir der egen(ante) Buben solich vorgen(ante) dritthalb hundert Schok an vnser stat
vßgericht vnd betzalt hat daz du jm dan desselben teils der mülen den wir dir dann versetzt vnd verpfendet
haben mit allen jren nuzen vnd zugehörungen genczlich abtretest vnd jm den als von vnsern wegen
vnd an vnser stat vmbgebest on alles verziehen wan so du das also getan hast So sagen wir dich fur vns
vnd alle vnsere nachkomen desselbn teils der mülen gancz quidt vnd lose mit disem brieue der geben ist zu prespurg
versigelt mit vnserm küniglichen Anhangendem Insigel Nach Crists geburt vierzehenhundert Jar vnd dornach in
dem Newndvndzweinzigisten Jare Am nechsten Sampstag nach sant Egidy tag Vnser Reiche des Vngerischen etc(etera) in
dem xliij des Romischen jm newnzehenden vnd des Behemischen jm Czehend jaren