Holczordnunge
Wir Katherina Abbtyssen vnd das gancz Conuent zw Znaym In vnser lieben frawen Sant Clarn Orden be=
kennen offenlich mit dyssem prieff dy yn lesin oder hyrn horen lesin das vor vns kumen ist vnser trewer
vnd andechtiger mulner mayster Steffan dy zeyt mulner auff der mul zw Taswicz vnd sich vor vns cla=
glich beklagt hat von wegen der grossen beswerung vnd des grossen zyns der auff der obgenanten mul
zw Taswicz ist vnd wyr auch das wasser yhm vnd auch den andren seynen vorfarn offt vnd dicke dy
weyr hynweck genumen vnd zubrochen hat mit grossen schaden vnd das dy lang weyr solichen schaden
an der weyr keyn mulner dreyden mugen mocht vnd das zw zwkunfftigen zeyten dy mul gancz od(er) mocht
werden vnd verlossen das weder der obgenant Conuent noch auch der mulner keyns nucz von der
obgenanten mul zw Taswicz haben mochten vnd darumb haben wyr angeschen eynen solichen vnsers Con=
uents zwkunfftigen grossen schaden vnd auch habyn wyr angeschen vnsers trewen mulner Mayster
Steffan dy zeyt mulner zw Taswicz vnd seyner freyntschafft fleyssiges bit vnd darmit er gebet vnd das
dy mul hynfurpas bey yren krefften vnd baw mocht bleyben Haben wyr genadicklich auch gelossen
yhm vnd allen seynen nochkumenden drey muth korn vnd drey sol er vns vnd vnsrem Conuent fur
alle seyne nochkumend geben alle Iar yerlich zw Sant Michahly tag an allen weyder spruch vnd zw
ewigen zeyten vnd auch eyn kalper zway zw den heyligen ostren eyn kalb zw den pfingsten vnd eyns
zw den weynachten vnd dy auch zw ewigen zeyten an allen lenczung zw geben dy das obgenant Con=
uent Ihm er sol auch abtreten vns vnd vnsrem Conuent dy weyr halden dy zw der mul gehort Ihm
werden mit aller zw gehorung vnd auch das lehen das zw der mul gehort hat das der Conuent an
obgemelten halden vnd auch dy lehen genyessen vnd prawchen sullen mit aller zw gehorunge zw
ewigen zeyten frey vnd ledig Des selbigen gleychen sol der mayster Steffan mulner vnd alle seyne
Nochkumend auch dy mul genyessen zw ewigen zeyten mit aller yrer zwgehorunge Item der lewten von
Conicz gewon wey auff dy ober steyn weyr mit aller yrer gerechtigkayt Item auch das mul hol=
czel mit seyner zw gehorunge Item eynen pawmgarten den man nent den mul pawmgarten theil
der tay vnd weyhel der tay auch mit seyner gerechtigkayt Item dy weyr praten byde amt graben
vnd mit staynem vmbvangen yst vnd auch mit dem holcz mit allen steten der mul graben von
der weyr yn auff dy mul auch dy hyrn steten vnderhalb der mul also weyt als der garten sich
hat der mulner sley zw fayschen Item auff der weyr hat der obgenant mulner zw legen drey reysche
Item wyr geben auch dem Mayster Steffan vnsrem mulner vnd allen seynen nochkumend ganczen
gewalt vnd macht das dy weyr mag bestechen vnd besteynen dan sy stet gros gelt das er nymancz
vnter der weyr fayschen noch krewssen sol lassen wurtz aber ymancz vnder der obgenante weyr begryff(en)
der sol vns vnd vnsrem Conuent an alle barmherczikayt ver fallen seyn eyn phunt pfeffer mit ainer
stroff darzw Item eyn pawmgarten anben dem mul pawmgarten der sol zyns dy kirchen Item eyn
pawmgarten der styst dem clumaler auch an den mul pawmgarten der gehort in den zyns dem mulner
zw Sant Michahlys tag Vnd des zw eyner besser bestetung kuffung zewgung vnd glawbens aller
obgemelten dungen habn wyr obgenant Katherina Abbtyssen zw Znaym bey der hymel kunge vnd Iunckfraw
Maria Sant Clarn Orden vnd auch das Erewirdig Conuent vnser sigell mit vnserm gutten wyssen
vnd verwillung zw dysem prieff an hyngen lassen Geben zw Znaym in dem obgenanten Closter an
Sant Ieorgij tag des heyligen marter do man perczelt noch Christi gepurt Tawsent ffunffhundert
vnd Inden zwanczigsten Iar