Wir Antonius Von Gots gnaden Erwelter Bischoff ků Wienn vnnd
General Magister des Kreitzher Ordens mit dem Roten Stern durch Behaim, Merern, Schlesien vnd
Polen, Benedictus Probost Auff S. Poltenburg bey Znaimb vnd der gantze Conuentt zu Prag
Im Spittall an der Prucken, Thuen kundt vnd offenbar für Jedermenniglich mitt diesem
Vnserm offnen brieff, für vns vnd vnsere Nachkhomen, Das wir vnserm Erben, armen
lieben getrewen Vnderthanen, Hans Schindlern in der newen Mühlen, Auff sein Vndertha=
nigk flehen, vnnd seiner freunde fürbitte, so ansehen, das er sich aufrichtig gehorsam=
lich vnter vnserm gebiett an Jedermans beschwerung gehalten hat vnd noch, Vergunt
vnd in gnaden Zugelassen haben, thun In krafft dieses brieffs Vergunen, Zulaßen, macht
vnd gewalt geben, das er sein gütt so Ihm der almechtige gott Verleihen oder noch Verleihen
mochte, ligend vnd fahrendte, schaffen vnd stieften magk nach seinem besten wolgefallen,
(wem er Vermeint vnnd will) an vnser vnnd vnserer Nachkhomen, vnd Iemandts hin=
derung, Doch das alzeidt der besitzer gedachter Mühlen, vnter vnserer Erden obrigkaidt
gehorsamblich als andere vnsere Vnderthane lebe vnnd sich verhalte, Vnd soll sich diese
Vnsere gnadigunge Auff niemandt anders dan auff In Hans Schindlern, vnnige Perso=
ne strecken, mitt Ausgedingter Vorbehaltunge das er Hans Schindler ligende gründe, Zur
Mühlen gehorigk nicht In mancherley hende theilen, sonder bey dem Haußgrunde der Mühlen
bleiben lassen, Neben Ihme auch diese Zulassunge aus gnaden, das er sein Vihe oder
was er sonst Zu margkt bringen mochte, Nach seinem besten Anwenden magk, an vnser hind=
nuß, Hiergegen soll er diese gnedige erlaubnuß Ihm selbs Zukommet fübren, vnd
sich alles gehorsambs kegen seiner Obrigkaidt beweisen, Zu mehrer Vrkund vnd ste=
ter Sicherheit haben wir Bischoff Zu wien als Obrister Meister des Ordens mit dem
Roten Stern, vnnd Benedict Probost Auff S. Poltenburg, vnsere Insigill an den brieff
drucken lassen, Geben Zu wienn am tage der heyligen Jungfrauen Doro=
thea, Im Tausent Fünffhundertt vnd Achtvnndfünfftzigistenn Jare.

|Haben dieserzeit|
|geben wir Bischoff Zu wien, als|
|Obrister Meister des ordens mit|
|dem Roten Stern|