Wir Antonius von Gottes gnaden, Ertzbischoff zw Prag, des heyligen Apostolischen Stuls Legatt, vnnd Obrister General Meister, der Creützer Herren mit dem Roten
Stern, durch Beheimb, Mehrern, Schlesien, vnnd Polen, Thun kund vnnd offenbar Jedermeniglich, dz fur vns erschinen, vnser vnnd vnsers Stiffts, der Praeposi=
tur auff Sanct Hypoliti berg, vber der Gradnitz bey der statt Znaim, vnderthan Hans Schindler, sambt seinem Sone Paulo Schindler, vnd vns furbracht einen besigelten
vortrag, so mit vorwissen, des Ehrwurdigen, Vnsers Andechtigen lieben Getreuen, Herrn Andreassen Starcken seligen, weylandt Probsten auff Sanct Hypoliti bergk,
auffgericht worden, Vnnd vns vndertheniglich vnnd gehorsamlich gebetten, denselben vortrag, wegen der Mulen, in den neuen mulen, auff vnsers Stiffts, grundt vnnd
bodem gelegen, die er Hans Schindler innegehabt, vnnd seinem Son Paulo In krafft gemeltes vortrags eingereumbt vnnd abgetretten, zw Confirmiren vnnd zwbestettigen
In allen puncten vnnd Clausulen, wie derselbe lautet, vnnd den sieben vnd zwantzigsten tag July, des funfftzehen hundert, vnnd Vier vnnd siebentzigsten Jares auff pa=
pir bracht, vorfertiget, vnnd gesigelt worden ist, Dessen gleichlautende abschrifft, bey dem Stifft Poltenberg vorhanden, vnnd der ander in Paul Schindlers, vorwarung
ist, Darinnen wir vns denne fleissig ersehen, vnnd nach furgehender berathschlagung befunden, das derselbe vortrag, zwischen inen, Son vnnd Vatern, Erbarlich vnnd
Christlich, wolbeschlossen, vnnd auffgericht ist, Derhalben auch in krefftig erkennen, vnnd hirmit Ratificiren vnnd bestettigen, Also, vnnd der meinung, das darwie=
der von keinem teil, vnter keinem schein, wie derselbige von menschlicher list, erdacht werden mocht, etwas zw wieder nun oder kunfftig, sol furgenomen, Sondern vonn
beiden teylen, fest, steiff, vnnd vnuerbruchlich, gehalten vnnd volzogen werden, Vnnd im faal von Ime Hans Schindlern, oder Paul Schindlern seinem Sone, vnnd seinen
Kindern, ettwas wieder solchen auffgerichten vortrag, erdacht, vnnd furgenomen, vnnd fur genuge bewiesen wurde, Sol es kein krafft noch macht haben, Sondern von der Obrig=
keit, dem Probsten auff Sanct Hypoliti berg mit straff gegen dem vorbrecher zw recht gebracht, vnnd der vortrag an Ime selbst, so wol auch diese vnsere Confirmation, ernstlichen
geschützt vnnd gehandhabt werden, Dessen zw vrkundt haben wir vns mit eigner Hand vndersschrieben, vnnd vnser gewonlich Pitschir, an diesen brieff hengen lass(en).
Geschehen im Closter Prug bey Znaim, Nach Christi vnsers lieben Herren vnnd seligmachers geburt, Im tausent Funffhundert sieben vnnd siebentzigsten Jare, den
funfftzehenden tag des Monats July.
Antonius