ANTONIUS JACOBUS SUCHANEK,
Sacri Militaris Ordinis Crucigerorum cum Rubea Stella per Bohemiam, Hungariam, Austriam,
Moraviam, Silesiam, et Poloniam Generalis ac Magnus Magister, Inclyti Regni Bohemiæ Prælatus Infulatus, Proto-Notarius
Apostolicus, necnon ad Inclytam ejusdem Regni Rectificationis - Commissionem Assessor.
Venerabili, ac Religioso in Christo Nobis Sincerè Dilecto Joanni Nepomuceno Stržecha Sacri Militaris Ordinis Nostri Pragæ Professo,
Hlaupetinij, et Dablitij hactenus Administratori Salutem in Domino.
Religiosæ Vitæ, morúmque integritas, ac fervens in DEUM pietas per annos supra triginta tres comprobata, zelus honoris DEI, et animarum
Salutis, quibus in vinea Domini ad triginta jam annos diversis in locis sedulò laborâsti, Decorémque Domûs DEI multo conatu, ac impensè dilexisti, aliáque laudabilia Scientiæ
et industriæ specimina, ac Sacro Ordini Nostro tam grata, ac fidelia præstita Obsequia /: quibus in œconomicis, et Administratura Dablicensi duodeviginti annis pro emolumento, et bono ejus
-dem Ordinis Nostri ferventer ac sollicitè temet impendisti, quibusque in spem solidam erigimur fore, ut et deinceps in Sacri Ordinis Nostri bonum sollicitè semper ferveas :/ meritò Nos inducunt ad
favores tibi exhibendos ampliores. Quapropter horum intuitu, necnon matura deliberatione, et de certa Scientia Nostra, adhibitóque Consultorum Nostrorum consilio tibi Joanni Nepomuceno Stržecha
tanquam personæ dignæ et idoneæ, singularis modestiæ, mansuetudinis ac Pietatis studiosæ, et de Sacro Ordine Nostro tam bene meritæ, Commendam cum suo Hospitali ejusdem Ordinis Nostri in Civitate Egra
sitam sub Patrocinio S. Bartholomæi Apli, et S. Wenceslai Martyris, Regis ac Patroni Bohemiæ /: quæ per obitum piè defuncti R(everendissi)mi D(omi)ni Joannis Leopoldi Schönpflug de Gambsenberg tanquam immediati
et ultimi Possessoris sui vacare, et cujus Collatio ad Nos quà Generalem, ac Magnum Magistrum privativè spectare dignoscitur :/ omni meliore modo, viâ, jure, causa, ac formâ, quibus meliùs, validiùs
efficaciúsque potuimus, et possumus præsentium tenore possidendam, et tenendam concedimus et conferimus, téque in verum, legitimum, et indubitatum præmemoratæ Commendæ, et Hospitalij Commenda
-torem nominamus, constituimus, præficimus, atque ità nominatum, et constitutum declaramus, investimus, et confirmamus: Dantes tibi in Spiritualibus et temporalibus omnimodam potestatem
de jure vel consuetudine huic Commendæ annexam, et competentem: Mandantes omnibus curæ tuæ taliter commissis, quatenus te pro vero et legitimo Commendatore suo recognoscant, habeant, et reve
-reantur, tibíque in omnibus et per omnia pareant, ac obediant: Appromittentes tibi contra quoscunque inobedientes, contumaces, aut refractarios auxilium Nostrum, et assistentiam nunquam defu
-tura: Concedentes tibi præterea jus et facultatem, ut te ex nunc, et futuris semper temporibus ùt Commendatorem geras, et scribas, locum et sessionem in Capitulis Generalibus, et alijs conventionib(us)
inter Confratres immediatè habeas post Præpositum Pöltenbengensem, et omnia ea jura ac prærogativas in Ordine nostro capias, quæ huic Commendæ tuæ annexa sunt; Omnibus ac singulis
Sacri Militaris Ordinis Nostri Confratribus insuper præcipientes, ut te pro tali habeant, agnoscant, et æstiment, Hac tamen Conditione ac lege: ut præviè Nobis, prout juris, ac moris est
præmissa juxta Sacro-Sancti Concilij Tridentini Constitutionem Professione Romano-Catholicæ Fidei, corporale juramentum ad manus Nostras præstes, quòd Nobis legitimo Generali Magno
Magistro, et Superiori tuo immediato, Nostrísque etiam legitimis Successoribus fidelis et obediens eris, Residentiam debitam observabis, inventaria debitè conficies, et Nobis transmittes, jura
pariter, possessiones et privilegia ad sæpè dictam Commendam pertinentia pro posse manutenebis, et defendes, nihil alienabis, distrahes, aut oppignorabis, sed si quæ alienata, vel distracta reperta
fuerint ad jus et proprietatem ejusdem Commendæ reduces, et reduci pro viribus tuis curabis. Reservantes unà Nobis, nostrísque Successoribus per expressum jus visitandi, corrigendi, aliáq(ue)
omnia, quæ de jure, vel consuetudine Generali Magno Magistro competere dignoscuntur. In quorum omnium fidem, ac plenissimum robur has Nostras literas manu propria subscripsimus, et majoris Sigilli
Nostri appensione scienter muniri, et expediri jussimus, Pragæ in Ædibus Generalatûs, et Magni Magisterij Nostri ad pedem Pontis die 15. mensis Martij Anno Domini Millesimo, Septingentesimo Quinquagesimo Nono.
Antonius Jacobus Suchanek,
Generalis Magnus Magister m(anu) p(ropria)