ANTONIUS JACOBUS SUCHANECK
Sacri Militaris Ordinis Crucigerorum cum rubea Stella per Bohemiam, Hungariam, Austriam, Moraviam, Silesiam, et Poloniam Generalis Magnus Magister,
Inclyti Regni Bohemiæ Prælatus Infulatus, Proto-Notarius Apostolicus, nec non Inclyti Provincialis Judicii, et Supremæ Regni Rectificationis, atque
Tributi Hæreditarii, et aliarum Commissionum Aulicarum Assessor & &
Venerabili in Christo, Nobis Sincero dilecto Domino Carolo Bernardo Hein S. Militaris Ordinis nostri Professo, et Hædnicensium Curato
Salutem in Domino.
Præclara vitæ, morumque honestas, eximia litterarum peritia, Singularis in agendis prudentia, animique moderatio, insignis in Deum, ac Ejus cultum
promovendum fervor, pietasque conspicua, qua ubique omnem tibi laudem et existimationem procreasti, testata demum in diversis etiam perjungendis negotiis dexteritas, et fidelitas, reliquaque laudabilia
specimina, quibus a S. religiosa Professione tua primum quidem qua Capellanus Regiomonti, Culmæ et Egræ - demum Pöltenbergæ qua Administrator Ecclesiæ Popicensis, postremo autem qua Curatus
Hædnicensis in cura animarum universim per annos triginta quinque cum Salutis alienæ promovendæ fervore, atque inde promanante tui commendatione te impendisti: hæc, inquam, specimina,
quibus te hactenus conspicuum reddidisti, et quibus etiam deinceps, prout in Domino confidimus, pro S. Ordinis nostro bono et honore te magis adhuc conspicuum reddes, merito nos inducunt ad favores tibi
exhibendi uberiores. Quare præmissorum omnium intuitu, matura cum deliberatione, et de certa Scientia nostra, adhibitoque Consultorum nostrorum Consilio, Tibi Carolo Bernardo Hein S. Militaris Ordinis
nostri Confratri tanquam personæ dignæ, discretæ, et de eodem S. Ordine nostro optime meritæ Præposituram infulatam in monte S. Hippolyti ad regiam Civitatem Znoymensem cis Tyam in Marchionatu Moraviæ
sitam per obitum piæ defuncti R(everendissi)mi D. Wenceslai Hlava immediate, et ultimi possessoris ejus legitime vacantem, cujus collatio, nominatio, et institutio de probata antiquissima consuetudine ad Nos
Generalem et magnum Magistrum pleno jure spectare dignoscitur, cum omnibus ac Singulis appertinentiis, et earum Fructibus, Juribus, Privilegiis, ac Prærogativis absque ulla diminutione, prout alii
ejusdem modi Præpositi eam tenuerunt, et possederunt, authoritate nostra hac in parte ordinaria præsentium tenore possidendam et tenendam concedimus, et conferimus, teque in verum, legitimum, ac indubitatum
in dicto monte S. Hippolyti Præpositum omni meliore modo, via, jure, causa, et Forma, quibus melius, validius, et efficacius potuimus, et debemus, possumus, et debemus, nominamus, instituimus, et investimus, ac ita
nominatum, institutum, ac investitum præsentibus declaramus, et confirmamus; dantes tibi omne jus, et potestatem alias huic Præposituræ tuæ quocunque modo competentem, volentes: ut præprimis a Sacratissima Cæs:
Regio-Apostolica Majestate tanquam actu gloriosissime regnante hæreditario Rege Bohemiæ, et Marchione Moraviæ Domino Domino nostro Clementissimo quoad temporalia eidem Præposituræ annexa te confirmari humil:
lime procures, demum te ex nunc, et futuris temporibus ut Præpositum geras, et scribas, Sigillo Præposituræ utaris, atque locum, et Sessionem in Capitulis Generalibus, et aliis Conventionibus inter confratres habeas an
tiquo tempore huic dictæ tuæ Præposituræ convenientem; mandantes omnibus et Singulis curæ tuæ commissis, ut te pro vero et legitimo Præposito Suo recognoscant, habeant, et revereantur, tibique in omnibus, et per omnia pareant
et obediant; appromittentes tibi contra quoscunque inobedientes, contumaces, et refractarios auxilium nostrum, et assistentiam nunquam defutura. Omnibus insuper, et Singulis S. Ordinis nostri Confratribus præcipientes,
ut te pro tali æstiment, et agnoscant; hac tamen conditione ac lege: ut prævie Nobis, prout juris, ac moris est, juramentum præstes, quod uti alias ita deinceps Nobis Generali Magno Magistro, et Superiori tuo immediate
nostrisque etiam legitimis Successoribus Fidelis, et obediens eris, Præposituram hanc bene et utiliter reges, ac Fideliter administrabis, agros, Sylvas, ædificia, possessiones, privilegia, atque alia jura omnia ipsius Præposituræ
manutenebis, et pro posse defendes, nihilque, quod ad præfatam Præposituram pertinet, alienabis, oppignorabis, commutabis, aut debitis gravabis, sed potius alienata, distracta aut oppignorata ad jus et proprietatem
ejusdem Præposituræ reduces, vel reduci et restaurari pro viribus tuis curabis. Denique uti Parochiæ, et Ecclesiæ Hædnicensis, cujus jus Præsentationis immediate ad Nos pertinet, aliarumque Ecclesiarum administrationem
de nostro arbitrio per Confratres Ordinis nostri debite providebis; ita etiam et præcipue pro pauperum debita conservatione, eorumque congrua sustentatione, et omnium rerum eisdem necessariarum provisione, nec non
de avita Fundatione ac consuetudine Hospitali Prageno præstari solita pariter diligenter præstabis, et præstari facies; reservantes una Nobis, nostrisque Successoribus pro capressum jus visitandi, corrigendi, atque
alia omnia, quæ de jure vel consuetudine Generali Magno Magistro competere dignoscuntur. In quorum omnium fidem, et plenissimum robur has nostras litteras manu propria subscriptas dedimus, et
majoris Sigilli nostri appressione scienter communiri, ac expediri fecimus. Actum Pöltenbergæ in Præpositura S. Hippolyti die 31. Octobris Anno Incarnationis Domini Millesimo Septingentesimo Octogesimo
Nono.
Antonius Ja Suchanek
~m(anu) p(ropria)~