W(i)r Fr(ater) Barnabas Sacræ Theo
logiæ Doctor Guardian ad Beatam Virginem Mariam zür Iglaw vnd
Custos Prouinciæ Austriæ, Thuen khundt vnd bekhennen hiermit, Demnach Wir ein Wasser vnter
der Holzmühl liegent die Hollmühl genant, vnd ein Wiesen darbey gelegen, so von alters hero auß dem Allmosen
Margarethen Fuchsin vnd Margarethen Waltherin vmb ein Hundert Vngerische Guldten zue vnserm Convent
erkhaufft, vnd volgendts den Meistern der Tuchmacher vmb einen gewissen Zins außgethan vnd verlichen worden.
Nunmehr auß erheblichen vrsachen vnd wolbedacht, sonderlich aber zue mehrerm Nüzen des Convents vnd mit
Consens Admodum R(everendi) P(atris) Clementis Widmers als Prouincialen in Osterreich vnd Mähren, ehegedachtes Wassers
vnd Wiesen Dem Edlen vnd Gestrengen Herren Johann Haydtern von Bückhaw (et)c(etera) Khayserlichen Richtern
alhier zür Iglaw Dessen Erben vnd Nachkhommen zue ewigen zeiten eigenthümblichen vberlassen Das wol
gedacht Ihr Gestreng dargegen nicht allain zwey Hundert Gulden Reinisch auff ewigen widerkauff einem Ehr
samen Rath dieser Stadt Iglaw hindterlegt, welche Jährlichen auff Vnser lieben frawen Liechtmeß vermüge
Ihrer des Raths Vnserm Convent hierüber außgefertigten innhabenden Verschreibung, J(ährlichen) zehen gulden verzinset
werden sollen, Sondern auch vber dieß der Hollmühl halber einen Garten vor dem frawen Thor zwischen Georg
Haußwerths vnd Anna Paußpertlin Garten gegen der Strassen vnd Stadtgraben vbergeleget, Vns als Con
ventualen vnd S(ancti) Francisci ad B(eatam) V(irginem) Mariam zue ewigen zeiten zuegeniessen vnd zuegebrauchen, wirckhlichen vber
geben vnd eingeraumet. Dahrzue wahren Vrkundt vnd versicherung, hab(en) ich Fr(ater) Barna
bas Guardian des Klosters ad B(eatam) V(irginem) Mariam zu Iglaw diesen Brieff mit Vnsers Convents, Als auch mit meiner
Custodiæ, nit weniger als Ihr Gestreng Herr Khayserrichter vnd ein Ehrsamer Rath anhangenden Insigeln
gefertigt, vnd ist dieser auffgerichter Contract dem alhiesigen Stadtbuch einverleibt worden. Actum Iglaw am
Tag vnser lieben frawen Liechtmeß, dieses Ein Tausent, Sechs Hundert fünff vnd Zwaintzigste Jahre.