Wir Leopold von Gottes gnaden Erwöhlter Römischer Kaiser
Zu allen zeitten Mehrer deß Reichs in Germanien zu Hungarn, Böheimb, Dalmatien, Croatien vnd Sclauonien König, Ertzhertzog zu
Österreich, Marggraff zu Mähren, Hertzog zu Lützenburg vnd in Schlesien, vnd Marggraff zu Laußnitz. Bekennen offentlich mitt diesem brieff, vnd thuen khundt Jeder=
männiglich, daß Vnß N. N. Fr: Siardus Prior, Supprior, Circarius vnd gantzer Conuent deß Königlichen Closters Hradisch, Ordi(ni)s Præmonstratensium, nechst Ollmütz, gehor=
sambst zu vernemben gegeben, Waßmassen Sie, nach zeitlichem hintritt weyland Alexij Wostitz gewesenen Abbtens daselbst zur Wahl eines Neuen Prälaten geschritten, Vnd in
gegenwarth Vnsers Königlichen Commissarij juxta ritum et Statuta Ordinis, den Würdigen, Vnsren lieben Andächtigen Fr: Norbertum Zirletzky, deß Closters Profes=
sum, durch Canonische vnd rechtmässige wahl erwehlt vnd constituiret hetten, mit vnterthänigster bitte, Wir gerueheten Vnß solche Wahl nit allain gnädigst gefallen zu
lassen, Sondern auch dieselbe, alß Regierender König zu Böheimb, vnd Marggraff zu Mähren in gnaden zu confirmiren Vnd zu bestättigen. Wann Wir dann gnädigst
Angesehen solch Jhr vnterthänigste bitte, benebens bemelten neu erwehlten Abbtens guete Qualiteten vnd Tugendten, deren Vnß er sunderbahr geruehmet worden; Alß
haben Wir in Vnsere: Vnd Königlichen gnaden darein gewilliget, Vnd solche Wahl gnädigst Confirmiret vnnd bestättiget. Thuen das auch hiemit wissentlich, vnnd
in Crafft dieses brieffs alß Regierender König zu Böheimb, vnnd Marggraff zu Mähren, Mainen, Setzen, vnnd Wollen, daß Er Norbert Zirletzky nun vnnd hin=
fühero angeregtes Stifft vnd Closter, nach anweisung Jhrer Geistlichen Rechten vnnd Satzungen, nicht allain in Spiritualibus zu Lob, glori vnd Ehr deß Allmäch=
tigen, vnd fortpflantzung der Heyligen Catholischen Religion Verwalten, Sondern auch in temporalibus alle dessen Vnterthanen vnnd Zugehörige zu deß Stiffts Nutz
Vnd aufnehmen, seinem besten Verstandt Vnd Vermögen nach, regiren, die Ordens disciplin fleissig in acht nehmen, vnnd alles das ienige, was einem getreuen
Abbten vnnd Vorsteher, lauth seiner gethanen Pflicht zustehet, vnnd gebühret, auch zu erhaltung deß Stiffts wohl erlangten Priuilegien, Recht, vnd Gerechtigkeiten, nütz=
lich vnnd Vonnöthen sein wirdt, Jhme treulich anbefohlen sein lassen, in obacht nehmen, vnnd auffs beste befördern solle. Gebiethen hierauff allen
vnnd Jeden Vnsren Jnnwohnern vnnd Vnterthanen, waß Würden, Standts, Ambts oder wesens die in Vnsrem Erb Marggraffthumb Mähren seindt, hiemitt
Gnädigst, daß Sie mehrerwehnten Norbertum Zirletzky vor einen legitimè erwehlten, vnnd von Vnß gnädigst confirmirten Abbten vnnd Vorsteher tam in
Spiritualibus, quam temporalibus mehr bemelten Stiffts vnnd Closters zu Hradisch erkennen, vnnd Ehren, Insonderheit aber Vnsrere Königlichen Landes haubt=
mannschaft in Vnsrem Erb Marggraffthumb Mähren, daß Sie Jhne in Seiner Jurisdiction, Administration, vnnd Rechten geringsten nicht beirren, noch andern
dieses zu thuen verstatten, Sondern Jhme vielmehr in allen billichen Sachen, die handt biethen, vnnd gebührenden Schutz halten, auch auff erfordern helffen, denen
Ordens brüedern, vnd Jhm Stifft gehörigen Vnterthanen Ernstlich einhalten, daß Sie Jhme, alß Jhrem Vorgesetzten haubt allenschuldigen respect, Ehrerbiethung vnd
Gehorsamb leisten, bey vermeydung Vnsrer schweren Straff Vnd Vngnad. Hingegen Versehen Wir Vnß auch gegen Jhme Gnädigst, Er werde Zugleich dem Jenigen,
waß seine geleiste Pflicht mit sich bringet, Treulich vnd gehorsamb nach kommen. Zu Vrkundt diß brieffs, besiegelt mit Vnsrem Kayser: Vnd Königlichen
Anhangenden Grösseren Jnsiegel. Der Geben ist, auff Vnsrem Königlichen Prager Schloß, den Neündten Monathstag Octobris, im Sechtzehenhundert, Neun Vnd
Sibentzigsten, Vnsrer Reiche, deß Römischen im Zway vnd Zwantzigsten, deß Hungarischen im Fünff vnd Zwantzigsten, vnd deß Böheimbischen im Vier vnd Zwantzigsten Jahr.
Ad mandatum Sac(rae) Cæs(areae)
Regiæq(ue) Maiestatis proprium.
J. von Tam M(anu) p(ropria)