Research catalogue

Explore the charters

Search simply first. Refine only when the research question requires it.

1485_VII_13

CZ-MZA > E57 > 1485_VII_13

Source: MonasteriumAI palaeographyAI interpretation
Page 1 / 2
1485_VII_13, page 1
View
Transcriptiongemini-3.1-pro-preview
Wir Mertl spatzanders Andre groskrugar mit sambt paide Richter die zeit Schepphen vnd paide Gemain des dorffs Taswitz Bekhennen vnd
tuen kund Allermennigkleich mit dem Brieff für vns vnd alle vnser Erbn vnd Nachkhomen die In sehen hören oder lesen werden das wir von
vnserm guetn freyen willen vnd vnbetwungen von wegen der Eern vnd Glory des Almechtigen gots zu merung seines diensts vnd Auch
Zu preys vnd wirdigung der hochwirdigisten Junckhfrawen Maria der muter gots vnd aller heyligen haben wir verkaufft vnd In krafft des briefs
verkauffen wir Auff allen vnsern Erben vnd guetern die wir yez haben oder die wir vnd vnser Erben vnd Nachkhomen hyn für habn werdn
Zweliff schok grossen vnd Acht grossen phennig dzeutscher aymbs vnd zal rechtes erblichs Jarlichs zins den wir alle Jar raychen vnd bezalln
scholln vmb hundert vnd aynsundzwaynzig schok vnd zwaynzig grossn die wir berait eingenumen habn von wegn der Ewign fruemess
vnd darumb von wegn der obbemeltn Sum wir den zins Alle Jar Jerlichen vorraichen vnd gebn scholln halben tail das ist Sechs schok
vnd vier grossen zu den Nachstkhunfftign weynachtn vnd zu sand Johans tag gottes tawffer zu hant darnach folgund schollen wir Aber Sechs
schok vnd vier grossen zins geben vnd bezallen dem wirdigen herren Nicolao yezund vnserm pharr zu Taswitz vnd seinen Nachkomen pharrern
da selbs In dem loblichem gotsdinst der ffruemess vnd von dem selbigen gelt schol der pharrer Alle Jar seinem Caplan der die fruemess verpringt
vier schok gebn vnd schol In mit essen vnd trinken bewirtn vnd vorsorgen er vnd seine Nachkomen pharr vnd schol Im auch lassen zusteen
vnd gefallen alle kleyne zustent die von Alter her gewesen seind von der Chirchen darumb schol der selb Caplan Jarlich alle wochen vnd
Alle tag ein mess lesen vnd verpringn er oder der pharrer der yez ist oder khunfftig sein wirt Ausgenomen den Suntag An welichem Suntag
der pharrer phlichtig ist awszurichten ein singende mess vnd So offt aber die selb fruemess durch den pharr oder seinem Caplan In der
wochen nicht verpracht wird So schollen dem pharr an dem vorgenantn zins Alliez vier grossen ab gezogen werdn die selben vier grossn
schollen angelet werden zu der Chirchen zu Taswitz So Aber der pharrer vngeuerlich In vier wochen nachenander lauffig einen Caplan
nicht möcht gehaben der zu wegn pringn darumb hiet In der Abbt der yez ist oder sein wirdt vmb solich sawmbnuss zu straffen Als
sein rechter lehenherr So Aber Interdictum das ist Auffhebung gots dienst In der selben Chirchen zu Taswitz oder gemaynigklich In
dem pistumb zu Olomucz geleyt wurd wie lang das weret schol dem pharrer die weil an seinem Czins nichts abgen vnd ob wir
solichen Czins dem vorgenanten pharr oder seinen nachkomen nicht verraichten oder bezallten zu rechter zeit oder namlich In vier wochn
dar nach So hat er vnd sein nachkomen ganczn vollen gewalt das er vns Alle oder weliche er Ankumbt an allen enden Steten arestiren vnd
Sperren vnd auff dem feld mit gaistlichen oder weltlichem Rechten Auffhalden vnd verpoten mag vnd aus dem verpot nicht lassen So lang
wir Im Also versehne zins bezallen vnd entrichten vnd was dann der pharr vnd seine nachkomen solicher vnserbezallung halben darauff
darlegen wurden das er mit schlechter weysung an vnd beweisen mecht das sollen wir Im alles bezallen vnd ob wir hyn für nymmer zinsn
wolden So schollen wir ein halbs Jar die Gemelt Sum vor hyn Auff Sagen damit das ander ffruemess nicht abgee oder sawmbnuss nem
vnd So wir aber das gelt widerlegen wurdn hundert Aynsundzwaynzig schok vnd Zwaynzig grossen So schol man vns den Brieff widr
geben vnd wir schollen dann mit pett vnd hylff des Eewirdign herrn herrn Abbt zu pruk vnd vnser genedigisten Junckhfrawen Abbt=
syn zu sand Chlaren zu Znaim vnd vnsers pharrers zu Taswitz vmb die vorgenant Sum hundert Aynsundzwaynzig schok zwaynzig
Grossen anders wo ayns chawffen vnd besteten damit das dem gots dienst der ewigen fruemess nicht abgee vnd So wir nu den zins anders
wo gekaufft haben werden wir schuldig vnd phlichtig den selben zins mit vnserer darlegung einzufadern vnd vnserm pharr zu=
raychen Es hat Auch der Eerwirdig Herr Herr Paul die zeit Abbt zu pruk von seiner Sele heylwegn die drey Stifft der ffruemess Got
vnd der Junckhfraw Maria In lob vnd zu Eren mit seynem aygen geld mit fünff Schoken die vorgenant Sum erfult vnd gemert da=
mit das man Alle Suntag In dem gemayn pet pitten schol für Alle Stiffter der dawsign ffruemess vnd alles was oben an dem Brieff ge=
schriben stet geluben wir wie geschriben Richter Schepphen vnd payde gemayn In Taswitz zu ewigen zeiten stete vest vnd vnuerseert
zu behalden Als Erber frumb lewt des zu ewiger warung vestigkait vnd bestattung Haben wir gepeten die Eerwirdign herrn herrn
Paulen Abbt zu prugk vnd Eerwirdig Junckfraw Barbara vnser genadigiste fraw vnd Iren Conuent zu sannd Chlaren zu Znaim vnd
Auch dye Erwer weysen Burgermaister vnd Rat der Stat Znaim das sie Ire Insigl Angehangen haben an disen Brieff In vnd Iren Nachko=
men vnd Erben Anschaden Geben In dem Chloster zu prugk pey der Stat Znaim Am Erichtag an sannd Margareten tag Nach Christi
gepurd Tawsent vierhundert vnd In dem funffvnd Achtzigisten Jare

Scholarly transcription markup

(text)
Expanded abbreviation; the letters in parentheses are supplied.
~text~
Minor uncertainty.
|text|
Serious uncertainty.
¦text¦
Fragile reading.
<text>
Contextual reconstruction not securely visible.
# / #3w
Visible but unreadable writing.
^3w^ / ^2l^
Physically missing or damaged passage.