Wir Ferdinand der Dritte von Gottes gnaden Erwehlter Romischer Kaiser
Zu allen zeiten Mehrer des Reichs in Germanien, zu Hungern, Behemb, Dalmatien, Croatien vnd Sclauonien (et)c(etera) König, Ertzhertzog zu Osterreich, Marggraff zu Mähren, Hertzog zu Lutzenburg vnd in Schlesien, vnd Marggraff zu
Laußnitz. Bekennen offentlich mit diesem Brieff, Vnd thuen kundt allermänniglich. Demnach Vns der Würdige Vnser Andächtige Vnd liebe getrewe Benedict, Abbte Vnsers Stiffts Vnd Gottshauß Bruckh an der Teya, Vnd Vicarius Generalis des Heiligen
Præmonstratenser Ordens, gehorsambst züuernemmen geben, Daßmassen durch tödtlichen hindritt, weylandt Fratris Pleyer, gewesten Äbbtens, deß nechst Vnserer Königlichen Stadt Brün, liegenden Klosters Obrowitz, dasselbige erledigt Vnd Vacirendt worden, Vnd weilen es die Notturfft erfor
dert, gedt(es) selbiges stifft widerumb mit einem Geistlichen Haubt zubesetzen, auch zu diesem Ende, den Neundten Jüngstverstrichnen Monats July, durch deßes Heiligen Ordens gebräuchige Election canonice Vnd mit einhelliger Stimm, der Frater Godefridus Olenius erwehelt, vnd zu einem
Äbbten ermelten Klosters Obrowitz installirt Vnd eingesetzet worden were. So hat Vns Er Allerdembütigst gebetten, Wir erstgedachten Fratrem Godefridum Olenium, alß Äbbten zu Obrowitz Allergnedigst zu Confirmirn Vnd zubestettigen geruhen wolten. Wann
Wir dann gnedigst angesehen, solche seine demütige zimbliche Bitt, Vnd darinn gnedigst gewilliget: Alß haben Wir solche, mit deß Fratris Godefridi Olenij zum Äbbten zu Obrowitz fürgenommene Wahl hiemit in Kaiser(lichen) Vnd Königlichen gnaden ratificiret Vnd bestettiget, Ra=
tificiren Vnd bestettigen auch dieselbe, auß habender Macht Vnd Vollkommenheit alß Regierender König zu Behemb Vnd Marggraff in Mähren, Ober: Vnd Vögtte mehrgedachten Königlichen Stiffts hiemit wissentlich in Krafft diß Brieffs. Vnd gebieten hierauff allen Vnd
ieden Vnsern Vnderthanen, waß Würden, Standts, Ambts, oder wesens die in Vnserm ErtzMarggraffthumb Mähren sein, Insonderheit aber dem Ordinario loci, wie auch sonsten iedermänniglich, daß Sie offtgedachten Neugewehlten zu Obrowitz Fratrem Godefridum Olenium Vnd daß gantze Con=
uent erstermelten Klosters, bey solcher beschehenen Wahl, Vnd dieser Vnserer, hierauff erfolgten Allergnedigsten Bestettigung, geruhiglichen Verbleiben lassen, darwider nicht thuen, noch auch die zu offterwehntem Stifft, gehörige Vnderthanen, Ihme Äbbten Vnd dem Conuent, allen schuldigen gehorsamb zu leisten
Verhindern, oder sonsten in etwas betren, weder daß andern zuthuen gestatten, sondern sich gegen Ihme, gleich wie gegen seinen Vorfahren, alß Äbbten zu Obrowitz Verhallten, Vnd Ihn in allen, Ihme Von Recht oder gewonheit wegen, bey denen Landtägen, Zusammenkünfften, Königlichen Landtaffel, Vnd andern
gebührnüssen, Sessionen, Würden Vnd Herrlichkeiten, Vnweigerlich Admittirn Vnd zulassen, darfür erkennen, ehren Vnd hallten sollen, bey Vermeidung Vnserer schweren Straff Vnd Vngnade. Daß meinen Wir ernstlich. Zu Vrkundt diß Brieffs, besigelt mit Vnserm Kaiser(lichen) Vnd Königlichen anhangendem größ
sern Jnsigel, der geben ist in Vnser Stadt Wien, den Fünfften Monats tag Augusti nach Christy Vnsers lieben Herrn Vnd Seligmachers gnadenreichen geburt, im Sechtzehenhundert Vnd Fünfftzigsten, Vnserer Reiche deß Römischen im Viertzehenden, des Hungerischen im Fünff Vnd zwantzigsten, Vnd deß Behemischen im drey Vnd zwantzigsten Jahr.