Wir Wenczlaw von gots gnaden kunig zu Beheim Marggraff zu Brandemburg vnd zu lusig Bekennen
vnd tun kunt offenlich mit disem brieff allen den die in sehen oder horen lesen daz wir als ein kunig vn=
ser erben vnd nachkomen kunige zu Beheim wollen vnd sullen den Edlen Bernhart von Schonburg
Herren zu dem Hassenstein vnd Herman von Schonburg Herren zu krymetschow seinem bruder vnsern
lieben getwen vnd iren beider erben die burg zu Hassenstein mit allen iren zugehorungen vor aller
ansprache die des Edlen friderichs von Schonburg kinder die er gelazzen hat oder noch gewinnet darzu
gehaben mochten in dheineweis sie vertreten mit dem rechten on geuerde Wer aber sache daz sie iemant
ansprechen wurde on rechte vmb die egen(anten) vesten Hassenstein vnd irer zugehorungen vnd sie angrei=
fen wolde pintlichen So wollen vnd sullen wir vnser erben vnd nachkomen kunge zu Beheim sie vor
aller gewalt schuczen vnd schirmen wider allermenglich on geuerde Mit vrkunt diz briefs versigelt
mit vns(er)m kuniglichen Insigel Der geben ist zu prag nach Cristi geburt dreuczenhundert Jar dar
nach in dem siben vnd sechczigisten Jar An sand Barbaren tag der Heiligen Juncfrawen .

. p(er) d(ominum) Burchardum Burgg(ra)uiu(m) Magdeb(u)rge(nsem)