Wir Cune van Gotz genaden Ertzebisschoff zu Triere des heiligen Roemischen Rychs durch Welschlaut Ertzekentzel(er) Coadiutor deme Erwerdigen
in gote Vadere hern Engelb(er)te Ertzebisschoffe zu Colne van deme stule van Rome gegeuen dun kunt allen luden ind bekenne offenliche in dese(m) brieue
dat wir vmb manichfaldige gunst frundtschaff ind genade die der aller durchluchtigste furste her Karl van gotz genaden Roemischer keiser zu
allen tzijden merer des Rychs ind kunig zu Beheim vns lieber genedig(er) h(er)re vns ind vnse(m) gestichte van Triere ind deme gestichte van Colne
dicke genediclichen gedain ind van siner keiserlicher mildicheit truwelichen bewyset hait deme selue(n) vnse(m) h(er)ren deme keisere geloeft hain ind ge
loenen in guden truwen Oft geuiele dat der hogeboren furste her Wenczeslaus hertzoge van Lutzeluburg van Lymburg ind van Brabant
vnss egen h(er)ren des keisers bruder abeginge van dodes wegen aijne sune oder dochtere in dusen tzijden dat wir dan deme v(or)gen(anten) vnse(m) h(er)ren dem
keisere ind of er noit were sine(n) sunen of dochter(e)n Jnd of der keyn en weren des got noyt en wille deme durchluchtigen fursten hern Johane
marggreue zu mereren vnss v(or)gen(anten) h(er)ren des keisers brude(r) oder sine(n) kinde(n) of er seluer verlaren were oder yren eruen gunstich vinderlich
behulflich beredich ind bystendich truwelichen sijn sullen ind willen dat sij dat hertzochdum van Lutzeluburg burgen mit den steden burgen
landen luden herlicheiden ind allen Rechten die dar zu gehozent erweruen ind ingewynnen oder yman were die sij dar an hynder(e)n kroeden
of im vngehorsam ind wederstremich sijn wolde sunder alle argelist ind geuerde Vssgenomen ind behalden doch vnss ind vnse gestichte van
Triere vnser geruhte rechte alre herlicheit ind vryheit geistlich ind werentlich da sij vns noyt ane hynder(e)n noch yrren en sullen mer wir
sullen dar by vredelichen blyuen in alle der maissen ast van alders her comen ist Jnd des zu vrkunde han wir vnse Jngesigel an desen bnef
dun henken der gegebe(n) ist zu frankenfort Jn den Jaren vnss h(er)ren dusent dryhundert Seuen ind sechtzich nach gewonheit ze scriuen
in vnsem gestichte van Triere vp sente Agathen dach der heiliger Juncfrouwen (etc)