Ich Hans Steimlinger von Liechteneck Bekenne vnd tun kunt offenlich mit disem brieff allen den die jn sehen oder horen lesen Daz ich mit wolbedachtem mute
nach rate meiner besten freunde mit rechter wizzen vnd an den zeiten do ich daz wol getun mohte mit gutem freien willen vnd vnbetwungen recht vnd redlichen ver=
kauffet habe vnd verkaufe mit disem briefe dem Allerdurchleuchtigisten fursten vnd herren hern Karl Romischem keiser zu allen zeiten merer des Reichs vnd
kung zu Beheim als einem kunig zu Beheim Vnd dem durchleuchtigen fursten hern Wenzla kunig zu Beheim Marggrafen zu Brandemburg vnd zu Lusicz
meinen lieben gnedigen herren jren erben vnd nachkomen kungen zu Beheim vnd der Cronen desselben kunigreichs meine Vesten liechteneck die ich von dem
egen(anten) meinen herren dem keis(er) als einem kunig zu Beheim zu lehen gehabt hab mit allen lehenschefften manschefften guten gulten leuten rechten gewonhei=
ten eren zinsen welden wisen eckern nuzen freiheiten vnd mit allen andern zugehorungen wie man die auch mit besundern worten benennen mag vmb
Tusent pfunt heller der er mich recht vnd redlichen bezalet hat mit gereitem gelte vnd drumbe verzeihe ich mich fur mich Walpurg mine eliche wirtinne
vnd mine erben vnd nachkomen ewiclichen alles rechten forderunge vnd ansprache die wir zu der egen(anten) vesten liechtenek vnd allem dem daz darzu gehoret als
dauor geschriben stet gehabt hab(en) noch hetten oder gehaben mohten nichemeweis Vnd verzeihen vns ouch sunderlichen aller hilfe geistliches vnd werltliches rechten
vnd aller geseze keiserlicher vnd pebstlicher busse der lande gewonheit vnd aller ander sachen domitte dieser kouffe nichemeweis gehindert mohte werden Auch
geloben wir dem egen(anten) vnsern herren dem keis(er) als einem kunig zu Beheim hern Wenzla sinem Sune kunge zu Beheim jren erben vnd nachkomen kungen zu Behei(m)
daz wir sie der egen(anten) vnser vesten liechteneck mit irer zugehorunge recht vnd redlichen weren vnd in die entweren wollen vnd sullen von aller ansprache vnser bru=
der vnd allermengliches nach rechte vnd gewonheit des landes zu Beyern Wer aber daz wir sulche werunge nicht volenten vnd daran sumig wurden so habn
wir in zu Burgen gesazet die vesten Ritter hern herman vnd Werne gebruder von Breitenstein Nykel Raydembach von Rosenliz vnd Erhart lobelcz Burger zu
Sulzpach vnuerseichentlichen dieselben wenn sie darumb gemant wurden in die stat zu Sulzpach reiten vnd do leisten zu einem offenen wirte als gute bur=
gen vnd von dannen nicht kumen wir haben denne die egen(anten) werunge genzlichen getan vnd volendet als vorgeschriben stet Vnd haben die egen(anten) vnß burgn
gebeten daz sie des zu gezeugnisse ire Jnsigele ouch an diesen brieff hengen wollen Vnd wir herman vnd werne gebruder von Breitenstein Nykel Raydem=
bach von Rosenliz vnd Erhart lobelcz burg(er) zu Sulzpach Bekennen ouch offenlich an diesem brieff daz wir durch bete des egen(anten) hans steimlig(er) fur die egen(anten)
werschaft seine burgen worden sein vnd geloben in guten trewen on geverde den egen(anten) vns(er)n herren dem keiser als einem kunig zu Beheim hern Wenzla
sinem Sun jren erben vnd nachkomen kungen zu Beheim wer daz sache daz man der egen(anten) werschaft bedorfete vnd die gute anspreche wurden Vnd derselbe
hans steimling(er) die werunge nicht tete noch volendet als vorgeschriben stet daz wir denne vnser iglicher mit einem knechte vnd zweien pferden in die stat
zu Sulzpach reiten wollen zu einem offenen wirte vnd do leisten als gute burgen vnd von dannen nicht komen es sei denne die egen(anten) werunge genzlichen
geendet vnd volfuret an vrkunt ditz briefs versigelt mit vnser aller Jnsigel der geben ist zu Sulzpach nach Crists geburt dreuzenhundert Jar dar
nach in dem Acht vnd Sechczigisten Jar an dem nehesten Donerstag nach dem heiligen Wynaht tag