Wir Albrecht von gotes gnaden Herczog ze Oesterreich ze Steyr ze Kernden vnd ze Krain Graf ze Tyrol (etc.) Bekenne
vnd tun chunt offenlich mit disem briefe allen den die in sehent lesent oder hörent lesen. Seind der Allerdurchleuchtigist furst
vns(er) lieber genediger herre vnd Vater her Karl Römischer kaiser ze allen zeitten Merer des Reiches vnd künig ze Beheim
vns zu der hochgebornen furstinne frawen Elsbeten von Beheim seiner Tochter vns(er) lieben Herczoginn vnd Gemaheln ze
haimstewr genczlich auzgericht vnd geantwurt hat zehen Tausent Schokg grozzer phennig Prager Münzze auf den Vesten
Achalt vnd hohen Stauffen vnd auf allem dem so darzu gehöret als die briefe wol weisent die vns derselb vns(er) genedig
herre daruber gegeben hat Daz wir darumb mit rechter wizzend vnd nach gutem Rate vnsers Rates vnd vns(er) frawen
der egenanten vns(er) Gemahel dieselben haimstewr ze rechter widerlegung auzgericht vnd bestanden haben nach des Landes
in Oesterreich Recht vnd gewonheit zwai Tausent phunt Sechshundert phunt vnd funf vnd zwainczig phunt iärlicher
phennig gulte Wienn(er) münzze auf vns(er) Mautt ze Lincz fur funfzehen Tausent Schokg grozzer phennig der egenanten
Prager münzze. Mit solichem vnderschaiden Ist daz wir vor der egenanten vns(er) lieben Herczoginn vnd Gemaheln abgen
vnd sterben. So sol die vorgen(ant) gulte auf der Mautt ze Lincz auf si geuallen vnd sol si die innehaben vnd nuczen zu iren
tägen vnd nach irem tode So sol danne die egenant gulte herwider an vns(er)n lieben Bruder Herczog Leupolten vnd vns(er)
Erben geuallen nach des Landes in Oesterreich Recht vnd gewonhait. Geschech aber daz die Mautt dasselbe nicht als vil
geltes getragen möchte Was danne daran abgieng das sol man ir erstatten von and(er)n vns(er)n Ampten vnd sol man si des
obgenanten geltes richten vnd tünn vor allermenklichem Ane widerred vnd geuerde. Was aber vber die egen(ant) Sume
dauon geualler das sol beleiben vns(er)m egenanten Bruder oder seinen Erben. Wäre aber daz si vor vns abgieng vnd
sturbe So sullen dieselben gulte vns vns(er)m lieben Bruder Herczog Leupolten vnd vns(er)n Erben beleiben Ane widerred
auch nach des egenanten vnsers Landes Recht vnd gewonheit Ane alle geuerde. Vnd daruber ze vrkünde So geben
wir disen brief Besigelten mit vns(er)m Insigel. Der geben ist ze Wienn an sand Augustins tag. NAch Cristes
gepurde dreuczehenhundert iar vnd darumb in dem Newn vnd Sechczigisten iare.

Ad m(an)d(a)t(um) d(omi)ni m(ar)ch(ionis) p(er) d(ominum) m(ar)ch(ionem) de L.
Ebh(ar)dus senior taly g(ra)t(i)ar(um).