Ich Andres von Hohenloch von Brunck genant bekennen vnd tun kunt offenlich mit diesem briue allen
den die in sehen odir horen lesen wann mir der Allerdurchluchtigiste furste vnd herre her karl von gots gnade
Romischer keiser zu allen zeiten mer des Riches vnd kunig zu Beheim min lieber gnediger h(er)re von besund(er)n
gnaden gebn hat die Jerliche stewr die er vnd daz riche hat vff siner stat Lindaw daz ich die vff heben
sol die weil ich leben Were nu sache daz ich von iemand gehind(er)t odir geirret wurd an vffhebunge vnd
innemung der vorgen(anten) ierlichen stewr ez wer von fursten Grauen friehen h(er)ren Riten knechten odir der
stette Gemeinshafte(n) odir wer die weren So spreichen vnd globn ich vor mich vnd alle mine Erbn vnd
nachkamen daz wir den vorgen(anten) vnsern h(er)ren den keiser daz heilige Romische Riche daz kunigrich zu Beheim
die Crone desselbn kunigrichs noch allez daz daz zu dem Riche vnd demselbn kunigrich zu Beheim gehort
nym(m)er in dheinen zeiten vmb soliche irrunge vnd hindernuzz sullen ansprechen vffhalten odir angriffe(n)
in dheinerleie wis Vrkund ditz briues vsigelt mit minem anhangend(en) Insegel der gebn ist zu Gratz
nach Cristus geburt druzenhund(er)t Jar darnach in dem Neun vnd Sechzigistem Jare vff den nehsten
Suntag nach vnser frawen tag als sie geborn wart