Wyr Bruder Nydaws von gotis gnaden Apt. Bruder Dytterych prior. Bruder Johannes probyst czu beskow. Bruder Johes vnderprior. Bruder Rudolfus kelner. Bruder Johannes buwmeyster. Bruder
Johannes phortmeyster. Bruder Gunther Custos. Bruder fridericus spytmeyster. vnde der gancze Conuent des closters Nuwen celle des grawen ordens gelegen by furstenberg yn deme bysstu(m)
czu odyssine von vnsern vnde vnses closters wegen Bekennen vnde tu(n) ku(n)t offenlych yn dysem brife alle den dy yn seen ader horen lesen daz wyr dorch sunderlyche vnde mergelychen
nu(t)cze vnde notdorft vnsers eygen closters myt wolbedachtem mu(t)te gemeynem Rate. des wyr eyntrechticlych yn vnserm Capitel uber eyn komen waren vorkouft haben vnde vor=
koufen myt dysem Briefe Rechticlych vnde Erblych yn eynem Rechten koufe deme aller dorchluchtigistem vorsten vnde heren hern karlyn Romy(s)chen keyser czu allen czyten merer des
Ryches vnde konyng czu Behemen vnsern lyben genedygen heren als eyme konynge czu behemen. konyng wenczlaw syne(m) sone yren Erbyn vnde nachkomen konygen czu Behemen vnde der
Kronen des selbygen konyngrychs vnser Stetyl furstenberg gelegen vf der odere myt allen phlegen Gescho(s)sen czynsen Gerychten lehen vorlehenten lu(t)ten vnde myt namen den Rytter(n)
dy selbyst myt deme dorfe Vogelsang genant. vnde yn deme selbygen dorfe czwu hufen vnde eyn vyrteyl. vnde eyne wyse genant der voytwynkel vnde allen Rechten dy wyr vnde vnse
closter dorynne doru(f)fe vnde dorumme gehabyt vnde besessyn habyn vnde vornemelych an czu hebene an der Margscheyde dy sych an hebet an deme Pfacze von den Malboumen dy
da steen vf deme Pfacze noch snurrecht vf dy spycze des waldes. waz keyn deme closter wert ys daz gehoret czu deme clostere. waz aber keyn der oder wert ys daz gehoret czu der
stat. vnde vorbas von der spycze des waldes vnde der walt gantz myt deme gewerfte daz yn den walt stoset bys vffe den Graben der des closters wysen vnde der stat wysen scheydet
daz gehoret czu deme clostere Aber das andere gewerfte daz vorden walt tryt myt den wysen daz yst der stat bys yn den selbygen grabyn vnde denne von den vorgenanten Malboumen
den Pfaczen nyder bys uff dy Malwyde vnde von der Malwyde gerychte dorch den walt bys vf dy stat da daz Malwasser von der lawnytz vellet yn den walt Alle datholtz daz nede
wenyng yst also doch bescheydenlych daz dy gebur des selbygen dorfes czu der lawnytz yn deme selbygen holtze czu yrre notdorft haben sollen fryheyt czuholtzene aber nycht czu vor
koufene vnde von deme selbygen Malwassere czwyschen den walde vnde deme luge bys an dy hopphegarten dy der stat czynsen den graben vf bys an daz vfaschu(t)tte vnde vort von
eyme vf geschutten czeychen bys czu deme andern vnde an dy Margscheyde des vorwerkes czu dylow vnde von der Margscheyde des selbygen vorwerkes bys an dy margscheyde des dorfes
czu dylow vnde von der Margscheyde des selbygen dorfes bys an dy Margscheyde des dorfes schonenflys. vnde von des selbygen dorfes Margscheyde bys an dy Margscheyde des dorfes czu der
palycz vnde von der selbygen Margscheyde vor den see palycz der da vnser vnde des closters yst bys an dy Margscheyde czuluttendorf vnde vorbas dorch den walt bys uff dy krumme
bysterytz vnde dy selbyge bysterytz vf bys an dy odere myt alledeme daz yn den vorgenanten Margscheyden beslossyn yst welden weyden puschen gerewten vngerewten wysen
eckern gewunnen vnde vngewunnen Akkerczynsen Gartenczynsen vnde sunderlych der wysen dy heyset der Potreyl vnde myt namen ynder odere czwyschen beyden uwern von
der bysterytz vf bys czu deme vorgenanten Graben Aller werder vnde alle czuge dy dorynne legen vnde ouch myt allen Rechten dy vf deme strowange vnde vf deme lachovange
gehabyt habyn vnde vornemelych myt czwen Burgstadeln vor der odelrase an der slube myt des du(f)els see myt der heyde dy eyne Mylelang beheltet vnde eyn vyrteyl weges breyt vnde
ouch an den bybern dy da gevangen werden myt deme honyngecynse vnde der czydelweyde dy die czydeleren haben yn der stat Grempczen vnde gebyte vnde ouch dy slube myt alle yren
vor(t)en myt allen Rechten Nu(t)czen Eren herscheften vnde czugehorunge wy man dy myt gemeynlychen vnde sunderlychen worten genemen mochte Nychtes vsgenomen als wyr vnde daz
egenante vns closter dy selbygen Guter von allder her gehabyt vnde besessen habyn vsgenomen doch den see der genant yst sloppot wenne wyr den myt allen synen Rechten vnde fryheitum
myt namen vns vnde vnseme clostere behalden vmme sechtzenhundert schog guter pragescher grosschyn dy her ouch vns myt bereytem gelde ganczlych vnde gar vorrychtet vnde beczalet hat
vnde dy ouch wyr vnde vnse closter wyder vnder dy egananten vnser heren dy konynge czu Behemen vnde dy krone des selbygen konyngrychs legen vnde wenden sollen vnde wollen vnde
dorumme so vorczye ouch wyr vns vor vns vnde vnser nachkomen des closters ewyglych der obgenanten stat vorstenberg der Burgstadel vnde aller vorgenanten yrre czugehorunge vnde
aller czuvorsycht vnde anspruche dy wyr vnde vnse closter daran ader an keynen yren teylen adyr stucken gehaben mochten yn keynen wys vnde wysen dy selbyn stat Burgstadel lu(t)te vnde
gut myt alledeme daz vorgeschriben stet Erblych vnde ledyclych an dy egenanten vnsern hern den keyser als eyme konynge czu Behemen konyng wenczlaw syne sone yre Erbyn vnde nach=
komen konyngen czu Behemen vnde dy krone des selbygen konyngrychs als an yre Rechte ordenlyche Erblyche vnde naturlyche herschift so daz dy borgere vnde lu(t)te der egenanten stat
vnde gu(t)ter aller huldunge Eyde vnde gelubde von vns vnde deme clostere ledyg vnde los syn sullen vnde yn vnde der kronen czu Behemen erblych vnde ewyclych gewarten als vorgeschry=
ben steet To yr orkunde dyses briefes vorsegelte myt vnsm vnde vnses Conuentes anhangunden Jnsygeln der gegebyn yst czu vorstenberg Nach Cristus gebort drytzenhundert
Jar dor nach yn deme sybenczygistem Jare An deme sunthage als man synget Jnuocauit etc