Wir Agnes von gots gnadn Herczoginne yn Slez frouwe von furstinberg zu der Swidnicz vnd zu dem Jauwer
Bekennen offenlich mit dysem briue alln den die in sehn horen odir lesen Wann is von gots vorhengnizze
sich also gefuget hat daz wir den hochgeborn fursten herczogen Bolken etwenn herren zu der Swidnicz seliger
gedechtenizze vnsin liebn herren vnd gemaheln obirlebet habn vnd wir die land vnd furstentume die er
gelazzen hat innehabn halden vnd vns lebetage besiczen sulln dorumb so globn wir dem allirdurchluch
tigstem fursten vnd herren hern Karle romischem keis(er) zu alln czeiten merere dez reichs vnd kunige zu
behem vnsim liebn gnedigen herren als eynem kunige zu behem dem durchluchtigen hern Wenczlawen
seinem sone iren erbn vnd nachkomen kunigen zu behem yn guten truwen ane geuerde daz wir keynen
burkgrafen vorkeren vorwechseln odir vorwandeln sulln noch wolln yn denselbn landn vnd furstentumen
yn Steten odir wo die burklesin gelegen sint is sei denne daz wir eynen bedirbn man der gleich gut
vnd gewis sei dem fordern an seine stat seczen an dem den egenan(ten) vnsim herren dem keis(er) als eynem
kunige zu behem hern Wenczlawen seinem sone iren erbn vnd nachkomen kunigen zu behem billichen
gennugen moge vnd daz derselbe kegen in sich allir globde eyde vnd truwe vorbinde der sich sein vorfar
vorbundn hatte an dez stat er gesaczet wirdt Mit vrkund dis brieffs vorsigelt mit vns(er)m grozzen an
hangendem Ingesigele Gebn zu der Swidnicz an sant Georgy obind Nach Gots geburt dreiczenhund(er)t
iar dornoch yn dem sebnczigstem iare