Wir Otte von gotes gnaden marggraue zu Brandemburg des heiligen Roms obirstercamerer pfalzgraue by Ryne Stephan der eltir fur ander
Stephan friderich vnd Johans des genant(en) herczogen Stephans des eltir sone herczogen in Beyern bekennen vnd tun kunt offenlich(e)n mit
disem briue allin den dy in sehen adir horen lezen das wir fur vns alle vnser erbin vnd vnser helfere vnd dynere mit wolbedachtem mute vnd
mit recht(e)n wissen eynen ganczen steten frieden mit dem allirdurchluchtigsten fursten vnd herren h(er)n Karle Romisch(e)n keiser zu allin ziten
merer des Richs vnd kunige zu Behem(en) vnd allin sinen erbin dem hochgebornen fursten h(er)n Johansen marggrauen zu merhern sinem bruder
dem Erwirdigen vater in got h(er)n Albrechte Erczbyschoue zu magdeburg vnd den hochgebornen fursten h(er)n Albrechten vnd h(er)n Leupolden herczogen
zu osterrich zu steyern vnd zu kernd(e)n vnd and(er)n sinen helf(er)n vnd dynern vns(er)n wid(er)sach(e)n geteidingt vnd gemacht habin von dem
nehsten sente martins tage vnz uff pfingsten dy schirest kumen vnd vnd dornoch obir eyn ganczes Jar deryn wir den durchluchtigen fursten
h(er)n ludwigen kunigen zu vng(er)n den Erwirdigen vater in got h(er)n pilgrymen Erczbyschof zu salczburg des bebstlich(e)n stules legaten vnd ander
vnser helfer vnd dyner genomen habin Vnd des gelobin wir in guten truwen ane geuerde dem genant(en) vns(er)m herren dem keis(er) vnd allin sinen
erbin das wir denselbin friede in allin sinen meynungen behaldungen vnd synnen gancz stete vnd vnuerruckt halden vnd habin wollen in allir
der mazze als hirnach geschrebin stet In den ersten das vnser leute an beidensiten wedir stete noch slosse d(er) marke zu Brandemburg zu
keiner huldunge twungen sol werdin mit teidingen noch mit fruntschaften noch sust in dheinerleies Vnd ab dieselbin stete vnd lantsessen
der marke besament adir besund(er) mit guten willen vnbetwungen vnd vnbeteidingt sulche huldunge vns vns(er)n wid(er)sach(e)n vns(er)n vnd iren erbin
beidensiten tun adir ufftragen wolden dieselbin huldungen sullin vnser dheiner an beidensiten nicht uff nemen alle dy wile vnd czeit als d(er) egenant(e)
frede weret Wurde abir d(er) egenant(e) marggraue Otte von Brandemburg ynnehalbinde den czeiten des egenant(en) frides do got lange fur sy so sol der
egenant(e) frede genczlich(e)n abesin Vnd keyne kraft habin beidensiten Dornoch vmb dy stete monchberg vnd borge dy iczunt dy hochgebornen
fursten vnser ohmen die marggrauen von meyssen an des egenant(en) vns(er)s herren des keis(er)s vnd des Erczbyschoues zu magdeburg getruwen
handen ynnehabin wullen wir beidensiten is also halden das sie alle die czeit vnd d(er) egenant(e) frede werit in gewalt vnd huden der egenant(en)
vns(er) ohmen d(er) marggrauen zu meyssen bliben sullin Ouch sullin alle burgere vnd Jnwomere d(er) selbin stete in guten desselbin fredes wand(er)n
uff landen vnd uff strazen in koufmanschaften vnd allin and(er)n iren notdurften glich and(er)n steten d(er) marke zu Brandemburg vnd sol vns
nung man in zufuwen getreide kofte vnd alle notdurfte glich and(er)n steten als vormals gewonlich ist gewesin vnd sol sie deryn nymant hind(er)n
ane geuerde Dornoch welch(e)r czeit d(er) egenant(e) frede begeet adir ab is zu sulchen schulden queme das der egenant(e) marggraue Otte zu Brandemburg
ynnehalbinde den czeiten des egenant(en) fredes sturbe do got lange fur sy so sullin die egenant(en) vnser ohmen dy marggrauen zu meyssen die egenant(en) stete
monchberg vnd borge dem egenant(en) vns(er)n herren dem keiser vnd sinen erbin vnd dem egenant(en) Erczbyschoue zu magdeburg iren nochkomen wid(er)
liben sie das empfelen wid(er) ynantwurten in allir der mazze als sie dieselbin stete von dem egenant(en) vns(er)n herren dem keiser vnd dem Erczbyschoue
von magdeburg yngenomen habin czu urkunde dis briues besigelt mit vns(er)n anhangenden Jngesigeln Gegebin zu pirn uff der Elbe an
sente gallen tage noch cristes geburte driczenhundirt Jar vnd dornoch in dem eynvndsebeczigsten Jare

aufcultata

aufcultata