Wir fridrich Balthazar vnd wilh(el)m von gotis gnadin lantgrauen in doringen vnd marggrauen czu myssen bekennen offinlichin an diessem kegenwertigen briue vnd
tun kunt allen den die yn sehen horin adir lesin daz vns d(er) edele er thymo von koldicz durch sundirliche dinst vnd bete willin die er vns getan hat daz wir
bekant wird czu vns gekouft habin geligen hat sybinhundirt vnd vnd dreyzig schok vnd czwenczig grosschen freyberger munge da wir ym vor gesaczt habin wir
vnd sybinczig schok vnd dreyzig grosschen ouch freiberg munge Jerlichs zinses die ym von den czweyn vnsern steten hayn vnd grymme geuallen sullen
czu dem ersten sal die stat hayn ym beczalen vf den nesten sant walpurg tag sybin vnd dreyzig schok vnd czwenczig meyssener grosschen vnd darnach sal die
stat grymme ym beczalen vf sant michaels tag d(er) nest darnach kompt ouch sybinhundirt dreyzig schok vnd czwenczig nuwe meyssener grosschen vnd daz selbe gelt
als vorgeschribin stet sullen die obgenanten stete ym beczalen alle Jerlich vf daz hus czu koldicz ane alle hindirnisse vnd widirrede wer abir daz ym koldicz
abeginge da got vor sie so sullen sie ym sinen erben ad(ir) nachkomelingen den selbin zins beczalen czum wrczen ane widirrede vnd ane alle argelist vnd
were ob ym sinen erben ad(ir) nachkomelingen vf iczlichen tag als geschribin stet sin zins nicht beczalet wurde so glob(e)n wir vorgen(anten) brud(er) vor vns
sine erben ad(ir) nachkomelinge daz sithan nemen czu d(er) selbin stat zuhulfe da yn d(er) gericht wurde ane geuerde ouch glob(e)n wir vorgen(anten) brud(er)
in guten truwen ane argelist vnd ane allis geuerde swer da dem vorgen(anten) ern thymen von koldicz sine erbin ad(ir) nachkomelingen nicht beczale
daz obgenante gelt vns lenger lazze czustande daz sullen sie vns vorsagin ein halb Jar vnd ab er nicht were so er abir ad(ir) nachkomelinge wolten
vnsirn eynem brud(er) er ad(ir) sine erben da also vor gesaczt hetten in sinen briuen so sullen wir ym sinen erbin ad(ir) nachkomelingen die ob
genanten summe sybinhundirt vnd vnd dreyzig schok vnd czwenczig grosschen nuwe meyssener grosschen welich er d(er) eyner wil richten vnd becza
len vf d(er) huser ein czu koldicz ad(ir) czu den wrczen vf welich eynem wir von ym sinen erbin ad(ir) nachkomelinge vrmant wurden ane allis
vorczicze vnd widirrede vnd ouch sal dem obgen(anten) ern thymen von koldicz sinen erben ad(ir) nachkomelinge d(er) naste zins als da geschribin stet
gefallen ane allis geuerde ouch glob(e)n wir vorgen(anten) brud(er) mit gesampten hant dem obgen(anten) ern thyme von koldicz sinen erbin ad(ir) nach
komelingen nach d(er) vorrede vnd meynunge die vns von ym also getan wurde sin gelt richten vnd beczalen ane geuerde wer abir daz
wir des nicht tetin in welich(er) mazze wir gemant wurdin also daz ym sinen erbin ad(ir) nachkomelingen die obgen(anten) summe geldis die vor
geschribin stet von vns nicht beczalt wurdin so sullen wir ane allis vorczicze diese nachgeschribin burgen den edeln ern fridrichen
von schonburg h(er)re czu crhussow die gestrengen ern heynrich von kowfa ern nykel vnd ern walther von kokericz ern ditherich von hons
perge ern fridrich von kothawig er hansen von mylticz ern petern von bisenbz ern ditherichen von wiczaloyben ritt(er) vnd heynriche
von lengafelt ad(ir) wer ir iczlichen einen vnuermezlichen knecht sendin czum eychorne islichen mit eyme knechte vnd mit czweyn pfer
dan in eyne stat die vns von ym benant wurde darynne ein gewonlich inleger czuhaldin were ouch daz d(er) vorgeschribin burgen eyner
abeginge mit dem tode so sulle wir bynne eime mande einen andirn also guten an die stat seczin vnd wer ab die selbin vnse man vnd dyner in
dem inleger blebin wir vorgen(anten) sie lesten ad(ir) lesten nicht vnd dem obgen(anten) ern thymen von koldicz sinen erbin ad(ir) nachkomelingen ir gelt als vor
geschribin stet in d(er) frist nicht beczalt wurde so mag d(er) obgen(ante) er thymo von koldicz sine erbin ad(ir) nachkomelinge die obgen(anten) sumen geldis vf vn
sern stadin vnd eusten ad(ir) Juden gewynnen vnd vns(er) dyner sullen ir leistunge nymer komen is ensy danne daz wir dem vorgen(anten) ern thymen
von koldicz sine erbin ad(ir) nachkomelinge hoptgut vnd schadin den er also dauon enphangin hette gancz vnd gar vorricht vnd beczalt haten vnd
waz er by sinen guten truwen sprache daz er des schadin hette des sulle wir ym gloubin an allis geuerde vnd wer diesen brief hat mit sime
guten willen dem selbin glob(e)n wir alle diese vorgeschribin rede vnd dincz in alle iren binden vnd artikeln vnuerrucket stete vnd gancz
czuhaldin als ym selbin an geuerde vnd wir vorgen(anten) burgen glob(e)n an argelist vnd geuerde alle vorgeschribin rede stucke vnd artikel stete vnd gancz
czuhaldin vnuerbrochlich vnd habin des ouch czu warem orkunde vnser Ingesigele an disen brif lazin hengin gebin czu pynne nach gotis geburt
drezenhundirt Jar in dem einvndsybinczigsten Jare an dem dinstage vor sant seueri tage