Ich . Jan . von hirßfelde . Bekenne . vnd thun . kunt . vor mich vnd meyn erbn . vnd nochkome . offenlich an dysem
briefe . alln den die yn sehn ader horen lesen daz mir der Edle . herre her Thime von koldig camermeister
vnß herre des keysers . vnd houptma zu vreßlaw . vorcawft vnd vorlizen hat . daz hus vnd . gut die hir
noch geschribn sten . zu eyme rechten . lehn . vnd eyanschaft . daz hus zu flugelßberg . swaz er teyles dar an
gehabt hat daz antwerk vnd swaz darzu gehort . von ackerwerke vnd alle teyche . vnd fischerey . die er do .
gehabt hat . vnd ouch swaz er teyles an dem kyrchenlehn gehabt hat . vnd swaz er cynses ader rechtes an
dem . dorf zu flugelßberg . vnd yn der mull . do selbns gehabt hat . vnd ouch mit gerichte . vnd ouch . swaz
her teyles an dem hayne hat vnd ouch an dem Bormsschen holcze . swaz vngeteilet ist gehabt han . vnd ouch
daz erlesch . vnd czschou kuffen . vnder dem . hayn . vnd ouch mit alln boymgartn swie her die selbn gut gehabt
vnd gehalden hat yn all . der weis . hat sie mir der obg(enante) . her Thime von koldig . sein erbn vnd nochkome vor
lizen vnd . vorcawft zu eyme rechten erbe zuhabn zuhalden vnd zubesißen . abbescheydn doch also daz ich
meyn erbn vnd nochkome . des selbn obg(enanten) herre h(er)n Thime von koldig seiner erbn vnd nochkome . besicze
man sein sulle . vnd daz selbe obg(enante) gut von ym zu eyme rechte lehen . vnd eyanschaft . halden vnd . habn
vnd . besiczen . erbelichen vnd ewiklichen . ouch sol daz selbe obg(enante) hus . vnß obg(enanten) herre h(er)n Thime . seiner
erbn vnd nochkome . offenhus sein . gege allermeniclich zu all yre note . ouch . sol ich vnd glube meyn
erbn vnd nochkome . yn gute truwen an allez geuerde wanne daz ist daz mich . meyn erbn ad(er) nochkome
von meyne herre den marg(ra)fen von meyssen her ader sein nochkome . bunge ader ledig schaffen daz . sie
vns der lehen ledig lazen . so sullen wir zu hant swaz . wir teiles han . ader wirt . von vnßm vaterlichn
erbe . zu vnßm teile . daz zu flugelßberg zugehort . den selbn teil sol ich . meyn erbn vnd nochkomen .
von dem . eng(enanten) . herre h(er)n Thime . von koldig . seine erbn vnd nochkome . yn all d(er) wez neme zu eyme
rechte lehn vnd . eyanschaft . als vor geschribn stet . ouch sol daz selbe teil des hus . wanne ich . ader .
meyn erbn los werden . von meyne herre den marg(ra)fen . von meyssen als obgeschribn stet . eyn offenhus
sein . gege allermeniclich . yn seine note des vorg(enanten) . h(er)n Thime von koldig . yn all der maze . als der teil
den ich itzt von ym . zu eyme rechte lehen vnd eyanschaft . enphengn . han . ouch . sol ich . vnd meyn erbn
vnd nochkome . steth zu den gutn halden die vor benenet sint . vnd swaz meyn herre . der eng(enante) . her Thime
von koldig an d(em) gut welde . holczer ader pusche . wysen ad(er) ecker theile do solde ich . meyn erbn ader
nochkome . keyn recht zuhabn . daz ich alle dise obgeschribn rede . stetecke vnde vnd wankel . stete gancz
vnd vnvorrucket habn vnd haldn welle . des han ich meyn ynßigel . vnd durch grozer sicherheit vnd . beste
czewge . wille . die Edlen . vnd erbn leute durch meyn bete willen mit mir ir ynßigel . zu geczuknisse an
disem brief gehange . der erst . der Edle . her albrecht von Egerk . herre zu mytsteyn . her andreas . von Erken
burg . h(er)r guncz . von sensteyn . her albrecht . von hgink . herre guncz . vucht . peczolt holoufer . Gotschalk stibig
henric(us) landorf . Nykel . von Emyg . vnd vil and(er) erber vnd byderfer leute der g(e)nug ist Nach . cristi
geburte dreycehnhundirt . Jar darnach yn dem czweyvndsibnczigisten . Jare an dem Sontage . Quasimodogeniti